Manchester United goalkeeper Senne Lammens chuan head coach Michael Carrick chuan team pumpui anga tlarhnung venhim leh ball cross lo dan chah kawngah player-te a nawr na (hammering) hle tih a tarlang.

Inrinni khan Old Trafford-ah United chuan chak mamawh em em chungin Tottenham Hotspur an mikhual a. Hun tawp dawn lamah Spurs player pakhat hnawhchhuah niin mi 10 chauhvin khel mah se, hun pek belh (added time)-ah mikhual lamin siphurh an rawn sut a, 1-1 in an inhnehtawk ta hram a ni.

He inkhelah hian Bryan Mbeumo chuan United hmahruaina goal a khung a, mahse Spurs lamin hun tawpah an sut leh ta tho a ni. Sandro Tonali chuan box chhungah ball a vawrh luh laiin Mbeumo chuan a dang hman lo va, tlarhnung lailia Lisandro Martinez pawhin ball thlir aiin Dominic Solanke-a tha nena lo chelh a buaipui zawk avangin, Solanke hian goal-ah a tauh lut ta a ni. Mbeumo-a'n goal a khung hma pawh hian Tottenham hian goal thun theihna chance ṭha tak tak an lo nei nual tawh bawk.

Inkhelh zawhah Lammens chuan chanchinbumite hnenah, "A beidawnthlak takzet a ni. Hma hruaina hunṭha kan siam a, goal kan khung a, mi 10 lakah 1-0 in hma kan hruai a, khatiang dinhmuna awm kha kan duhthusam a ni. Mahse hun tawp dawna goal kan chhuah leh ta mai kha a na hle mai. Hemi aṭang hian zir chhuah tam tak kan nei a ngai a ni. Season ṭha tak hman i duh chuan hetiang match hi chu mahni lama pawt liah hnehna chan ngei ngei a ngai a, chuvangin zir chhuah a, hmalam pan zel hi kan tan a pawimawh hle," tiin a sawi.

United hian tun season Premier League match 6 an khelh tawhah point 6 chauh an la hlawhchhuak a ni. Points dinhmun chungchang sawiin Lammens chuan, "Points hian thu tam tak a sawi a, chu chu a pawimawh em em bawk. A chhan chu league chunglama awm duh team kan nih vang a ni. Mahse chu zawng chu a ni bik lo. Kan khelh dan thlir chuan thil ṭha tak tak kan ti a, mahse tlarhnung venhim lamah erawh kan la nghet tawk lo va, a aia ṭha kan nih a ngai a ni," a ti.

A sawi zawmnaah Lammens chuan, "Vawiin chu a ziaawm deuh a, first half kha a harsa zual na a, goal chhuah lovin kan inhawng lova, khatiang match kha chu mahni lama pawh luh theih tura ngaih a ni. Season liam taa kan rilru puthmang ang deuh kha a ni a; kan theihna sang ber thehchhuak lo mah ila match ṭhenkhat kan la la thei ṭhin a nih kha. Mahse tunah chuan kan khel ṭha zawk deuh anga kan inhriat lai pawhin hnehna kan phu ang kan hmu zo leh si lo a ni," a ti bawk.

Carrick-a'n tlarhnung venhim dan a zirtir chungchang an zawhna chu chhangin Lammens chuan, "Tlarhnung venhim hi team pumpui tih tur a ni a. Manager pawhin team anga ṭang ruala tlarhnung venhim leh khingpuite nawr a, a bik takin ball cross lo dan chah chungchang hi a sawi ngun hle a ni. Vawiin pawh khan a zia viau a, mahse a tawpah cross ṭha tak pakhat leh tauh luh ṭha tak pakhat avangin hnehna kan chan tur kha kan hloh ta a ni. Hetianga hun tawpa hnehna kan hloh ta mai hi a pawi takzet a ni," tiin a sawi.

Solanke-a goal khung chungchangah Martinez nen inbiakpawh loh (miscommunication) an nei em tih an zawh chuan Lammens chuan, "Inhriatthiam loh vang a nih ka ring lo. A hmasaberah chuan ball rawn cross tu kha lo dan chah tur a ni a, ball nei tu kha kan nawr nat tawk loh avangin awlsam lutukin cross a rawn siam a ni. Chumi hnuah Licha (Martinez) leh attacker inkarah inbuan buaina a awm a, attacker khan remchangah a la ta a ni. Mahse kan inkarah inhriatthiam loh a awm vang erawh a ni lo," tiin a chhang zui bawk.