Manchester United Under-18 lamin Liverpool Under-18 chu 6-3 ngawta an sawp ṭum khan, club legend Wayne Rooney-a fapa Kai Rooney chu a che ṭha hle a. A chet ṭhat em avang hian United fan-te chuan Michael Carrick-a enkawl first-team squad-a hlangkai ve tawh turin an phut chho nasa hle a ni.
Kum 11 mi lek a nih aṭanga United academy zawmtu kum 16 mi forward hian he hnehna ropui takah hian midang pet luh tur (assist) ṭha tak a siamsak a. July thla liam ta khan kum hnih daih academy scholarship inremna a lo ziak tawh a, kumin November 2-a kum 17 a tlin hunah he inremna hi kum thum daih professional contract-ah a inthlak nghal dawn a ni.
Season liam ta khan hliamin a tibuai ve deuh bawk na a, Under-16 leh Under-18 tan inlan tlangpuiin Under-16 Premier League Shield leh SuperCupNI nomawite a lo chawi tawh bawk a ni. Tun season-ah pawh Kai hian Under-19 UEFA Youth League leh Under-21 tan debut a siam tawh bawk a, mahse Under-18 lamah hian a la inlan tam ber a ni.
Liverpool an hmachhawn ṭum hian kawr nambar 9 hain tlarhmaah bul a ṭan a. Chawl lova tlanin khingpuite a nawr (press) na hle a, an chakna match-a goal li ngawt khungtu Jaume Camacho-a goal khung tur pawh mawi takin a siamsak nghe nghe a ni.
A khelh dan avang hian social media lamah United ṭantute chuan fakna thu an thehdarh chuai chuai a. Fan pakhat chuan, "Kai Rooney hi chu khingpuite nawr chhen chi, pressing machine dik tak a ni," tiin a ziak a. Fan dang pakhat pawhin, "Kai hian game ropui tak a khel a ni, a ṭha thlawt. A pa ang chiahin a tlan a - ball a um char char a, remruatna ṭha tak tak a siam bawk," tiin a pa Wayne Rooney nena an mizia inanna a sawilang hial a ni.
Mi dangte pawhin Carrick-a first-team squad-ah hian hmun a chang thuai tur a nih thu tarlangin, "First-team-a inlan thei dinhmun a hnaih tial tial e," an ti bawk. Fan dang leh phei chuan, "Kan Under-18 inkhel hi first team aiin en a nuam daih zawk! Tlan chakna, rualkhai taka ball in-um sak leh midfield-a buai map lova khelh theihna an nei a, chawlhkar tin an inkhel thlir hi thil thar hmuh ang maia hahdamthlak a ni. Naktukah hian first-team aiah an khel nghal mai thei lo'm ni?" tiin senior team chet chhiat lai nen an khaikhin hial a ni.
Hetianga academy rawltharte an chet ṭhat em em lai hian, first-team manager Carrick erawh chuan beisei an phak loh chhunzawm zel avangin pressure lian tak a hmachhawn mek a. Tun season Premier League-ah match sarih an khelh tawhah hnehna vawikhat chiah an la chang a ni. An match hnuhnung berah pawh Champions League-ah Italian club Como lakah 4-1 ngawtin an tlawm a nih kha.
Pathiannia mahni mual Old Trafford-a Bournemouth an mikhual hmain Carrick chuan an dinhmun khirh tak chu tlang takin a sawichhuak a: "Tun hnaiah hun ṭha kan hmang lo tih chu a lang chiang reng mai. Nilaini zana Como laka kan tlawm dan kha zan duhawm lo tak a ni a, khatianga kan khel kha ka na takzet a, pawm theih rual a ni lo. Ka mawhphurhna ber chu he football club leh kan fan-te tana chhuang taka thlir theih tur team khelmuala chhawr chhuah hi a ni a. Mahse tun hnai hian chu chu kan hlat hle a, chu chu kan vaiin kan hriatthiam a ngai a ni. He club hian lungphum nghet leh nunphung ropui tak kum tam tak a lo nei tawh a, chungte chu ka hrechiang em em a ni," tiin a sawi.
