Women's Super League-a a zawnin vawi hnih ngawt an inhnehtawk hnuah, Manchester United Women chuan inkhel harsa takah Aston Villa 1-0 in an hneh a, point pathum pawimawh tak an hmu ta a ni.
Chawlhkar engemaw zat liam ta khan Red Devils hian league hma hruaitu leh champion lai Manchester City chu 1-1 in an lo inhnehtawk pui tawh a. Mahse, kar liam ta khan Everton nen 0-0 a an inhnehtawk leh tak avangin an duh angin point an hmu hnem zo ta lo a ni. Aston Villa an hmachhawn ṭumah pawh hian United tan inkhelh chhung zawng tlarhnung ṭha tak mai thiah sak chu thil awlsam a ni lo hle a, mahse manager Eva Olid-i naute tan hian mi pawimawh bawk a rawn inlar leh ta a ni.
Tun season chhungin Arsenal leh Liverpool te laka goal lo khung tawhtu Julia Zigiotti chuan, team-in an mamawh takzet laiin bench aṭanga rawn lutin back post lamah lu hmangin goal a tauh lut a, match-a goal awmchhun chu a khung ta a ni.
Match zawha club website nen an inbiaknaah, Spanish manager Eva Olid chuan Zigiotti-a'n bench aṭanga rawn luh hnua goal a khung theihna chuan an squad mualbo loh zia leh theihna an ngah zia a phochhuak tih a sawi. Olid-i chuan, "Squad chungchangah chuan, mi tin hian inelna thianghlim nei tura intlansiak an ngai tih hria se ka duh a ni," tiin a sawi.
Olid-i chuan sawi chhunzawmin, "Vawiin hian ani (Zigiotti) hi bul ṭantu zingah a tel lo a, mahse a rawn inlan hnua a chet dan kha in hmu ang - goal a rawn khung a ni. Hei hian player dangte hnenah: ‘Ka duh a nih chuan bench aṭanga rawn lut pawhin thil eng emaw danglamna ka thlen thei a ni’ tih ngaihtuahna a pe tur a ni. Mahse, khelh an duh a nih chuan khelmualah nghawng (impact) an nei tur a ni," a ti.
Manager Olid-i hian Players' Cup-ah game li an khelh tawh aṭanga vawi li an chak fai vek avanga league phase-ah table chhip an luah theihna chhan lian tak pakhat chu an squad thukna (squad depth) ṭha tak vang a ni tiin a lo sawi tawh bawk a ni.
Zigiotti-a fak chhunzawmin Olid-i chuan, "Zigi hi vawiina a rawn luh hnu khan a che ṭha takzet a, a thawkrim em em a, chakna goal a rawn khung leh ta a ni - a chhan chu Liverpool laka kan khelh ṭum pawh khan chakna goal a lo khung tawh a ni. Kan tana player pawimawh tak a ni chho mek a ni," a ti a. Sawi belhin, "Mahse squad thukna ṭha tak kan nei hi a ropui hle a ni. Vawiinah pawh hian match thlak danglam thei tur option tam tak bench-ah kan kawl a. Manager pakhat tan phei chuan chutiang chu kan mamawh ber mai chu a ni," tiin a sawi.
Tun hnai chhawlhkar chhunga team hmasawnna chungchang sawiin Olid-i chuan, "A tirah kha chuan chawlhkar thum emaw li chauh hmang dun kan nih avangin hun kan nei tlem hle a, tunah erawh chuan hun kan hmang dun hnem ta zawk a," tiin a sawi. "Team hmasawn zia hi ka hmu thei a ni. Siamṭhat tur leh beih chhunzawm zel tur tam tak a la awm a, engkim hi a la famkim vek lo, mahse thil a kalchhoh dan leh hma kan sawn dan hmuh hi a nuam hle a ni," a ti bawk.
A tawp berah Olid-i chuan goal chhuah lova an chhuak leh thei (clean sheet) chu an tlarhnung vengtute a fak chhunzawm a. "Kan tlarhnung vengtute hi an che ṭha takzet in ka hria. Anni lamin chance lian tak vawihnih an nei a, chutiang hunahte chuan Phallon (Tullis-Joyce) hian min ṭanpui ziah ṭhin a ni. Mahse kan hma a sawn nasa hle in ka hria, box chhung leh a vela kan inkhelh dan chak zawng (intensity) pawh a ṭha tawh hle. Amaherawhchu inrintawkna nei lehzual turin ṭan kan lak a ngai a ni. Tun dinhmunah chuan inrintawkna hi a la hniam deuh nia ka hriat avangin, hemi siamṭha tur hian hun tam tak kan hman a ngai a ni," tiin a tlip ta a ni.
