Manchester United midfielder hlui Paul Scholes chuan dan bawhchhiatna avanga Manchester City hnen aṭanga nomawi leh medal chhuhsak a nih a, United hnena hlan a nih dawn chuan medal chu a duh ngei dawn thu a sawi a. He thilah hian a khelhpui hlui Wayne Rooney ngaihdan chu a kalh chiah thung a ni.

Tun kar tir lam khan Premier League chuan thubuai 115 an siamsak zinga 114-ah City chu thiam loh an chantir a, mahse City lamin thiam lohna an neih loh thu sawiin an zualko (appeal) nghal thung. Appeal an neih chhung hian hun eng emaw chen nghah a ngai dawn a, khelmual chhung leh pawnah City hrem theih dan tur chungchang sawi a hlawh hle mek a ni.

Hremna pek theih tura sawi rik zingah hian City-in nomawi an lo lak tawhte chhuhsak a, an hnuaia pahnihna dinhmun hauh tute hnena hlan chhawn chu a tel a. City champion tawh hnuah United hi vawi thum ngawt pahnihna an lo ni tawh a, chung zingah chuan Sir Alex Ferguson-a hnuaia Scholes leh Rooney te an la khelh dun ṭum, 2011-12 season ropui tak pawh kha a tel a ni.

City hnen aṭanga nomawi chhuhsak a nih hlauh chuan medal chu a duh ngei tur thu Scholes hian a social media-ah ṭawngkam na tak hmangin a tarlang a ni.

Inrinni khan a Instagram story-ah Scholes chuan, "Ka khelhpui hlui ṭhenkhatin City hnen aṭang chuan trophy chu chhuhsak an duh a, mahse medal erawh an duh lo tih an sawi ka hre fo mai. Chu thil chu a atthlak emai, duham tak ka ni a, ka medal tur chu ka duh ngei dawn a ni," tiin a ziak chhuak hial a ni.

He Scholes-a ngaihdan hi United striker hlui Rooney-a ngaihdan nen chuan a inperhsan hle thung. Rooney chuan Stick To United podcast-ah sawiin, City hnen aṭanga title laksak a nih pawhin medal thar dawn chu a duh loh tur thu a lo sawi tawh a ni.

Rooney chuan, "Rio [Ferdinand]-a'n Premier League medal dang neih theihna chungchang a sawi kha ka lo hria a... Mahse tlang takin sawi dawn ila, chutianga medal dang rawn dawn leh chu ka tan chuan a nuam lo tawp ang. Kha season khan league champion turin kan thawkrim tawk lova, medal dawn chu kan phu pawhin ka hre lo. Game li emaw panga emaw khelh hmabak kan neih lai khan point 6 emaw 7 emaw velin kan sang zawk a, mahse kan bawhbelh ta vek a nih kha," a ti.

Rooney chuan sawi chhunzawmin, "Ni tlemte liam ta chhung khan thil thleng zawng zawng ka lo thlir a, mi hrang hrang thusawi ka ngaihthla bawk a. Man City player-te dinhmun aṭangin thil ka thlir a... Khelmuala player-te kha chuan Premier League nomawi lak theih nan theihna zawng zawng an seng a, an rilruah chuan hnehna chang an ni. Hotu lute inrelbawl dan leh an chung lam thil thlengah khan player-ten hriatpui an neih miah loh phei chuan, chutiang chu ka chunga thleng ni se ka na ngawt ang," a ti bawk.

"Medal chu an chhuhsak a ni mai thei e, mahse team ang khan kha mi kum khan pakhatna kan nih miau loh avangin kan phu lova, keichuan ka duh lo ang. Chuvangin ka khelhpuite'n 'Medal ka duh' an ti a nih pawhin, kei chu ka nomawi lo lak tawh panga (5) ah khan ka lungawi tawk em em a, hetiang medal hi chu ka duh lo a ni. An neitute thiltih avang khan nomawi chu chhuhsak tur an ni em? A ni mai thei, mahse dawn let chu ka tan a nuam thei lo ang," tiin Rooney chuan a ngaihdan a lo sawifiah tawh a ni.