Manchester United chuan Old Trafford legend Wayne Rooney-a fapa, kum 16 mi Kai Rooney hnenah thla khat pawh tling lo hnuah professional contract an zawrh thei tawh dawn a ni.
Kum 11 a nih aṭanga United zawmtu he forward naupang tak hian tun dinhmunah club Under-18 team tan a khel mek a. Kumin July thla khan scholarship deal a lo ziak tawh a, hei hi Professional Development Phase group-a a inhlangkai theih nana ruahman a ni.
Kai-a scholarship contract ziah hi professional contract puitling a ziah theih hmaa rahbi hnuhnung ber a ni a. Kumin November ni 2-a kum 17 a tlin veleh hetiang contract hi a ziak thei dawn a ni. Hetiang dinhmun hi an academy player theihna ngah tak dang JJ Gabriel-a lakah erawh beisei a harsa hle thung.
Thawhlehnia kum 16 tling chiah Gabriel hian thla liam ta khan United chhuahsan a dil tawh a, Carrington training ground-ah pawh a la inlan leh lo hrim hrim a ni. He rawlthar hian kar thum chhung zet chu Spain ram, Catalonia bial chhunga Castelldefels khuaah awmin mimal coach rawihin training a lo nei mek zawk a ni.
Gabriel hi khawvel football huanga rawlthar theihna nei ṭha berte zinga chhal a ni a, a chhuak a nih chuan United academy tan hloh lian tak a tling ngei ang. United lamin scholarship contract an lo chhawpchhuahsak tawh laiin, Europe-a club lian Barcelona leh Real Madrid te chuan he naupang lakluh tumin inbiakna an lo neihpui tawh a. Sky Germany-in a tarlan danin Bayern Munich pawhin Gabriel-a aiawhtute hi an lo be ṭan bawk a ni.
Gabriel-a hmabak tur a chian loh em em lai hian, United tan chuan Rooney chhungkua aṭanga player thar Kai chu chelh ngheh theihna hun remchang a inhawng hlauh thung. A pa angin tlar hma laili lamah khel lovin mual dinglam sir (right wing)-ah a khel tlangpui a, mahse an khelh dan phung erawh a inang hle niin United icon Wayne Rooney chuan a sawi.
Disney+ docu-series 'The Real Rooneys'-ah Wayne chuan, "Kai hi Manchester United academy-ah a khel a, tumruh tak leh inpe em em a ni. Goal a khung thei a, duhthawhna lian tak a nei bawk. Keimah nen kan inang em em a, ke veilam hmang thiam zawk keimah lo inen ang mai ka ni a, a mak zawk hial a ni," tiin a lo sawi tawh a ni.
Season liam ta khan Kai hian U18 level-ah goal hnih a khung a, FA Youth Cup-a Derby County an hneh ṭum khan Old Trafford-ah debut a siam hman bawk. Mahse a ke hliam avangin a hun hman chhoh zelna tur a tibuai ta hlauh a, Manchester City laka FA Youth Cup final-a si khat faia an tlawm ṭum pawh khan a inlan ve thei ta lo a ni.
United hian Gabriel-a chan mai thei dinhmun an hmachhawn mek lai hian, Wayne Rooney-a thlah Kai Rooney hi hun rei zawk cham turin an thlungnghet thei dawn nge tih chu thutlukna pawimawh tak an siam a ngai chho dawn ta a ni.
