Manchester United chuan tun hnaia Carrington-a Lausanne Sport nena mipuite hmuh theih lohva (behind-closed-doors) friendly match an khelh ṭum khan, an striker naupang Enzo Kana-Biyik chuan a khelhpui hlui te a hmachhawn a. Nipui liam ta khan United hian a thlawnin (free transfer) an la a, Ineos neih Swiss club Lausanne Sport-ah hian an kaltir nghal a ni.
United nena contract a ziah hnu lawka Switzerland lama a kal nghal avangin United fan-te tan chuan he French rawlthar hi hriat lar a la ni meuh lo. Mahse, tun season-ah chuan thil a danglam chho tawh dawn niin a lang. Manchester Evening News chuan August thla khan United coaching staff-te chuan Kana-Biyik hi loan-a chhuahtir leh tawh lovin, 2026-27 season chhung chu club academy lama chelh an thlang zawk tih an lo tarlang tawh a ni.
United ngaihdan chuan, English football nena inmil chho tura he rawlthar puitlin chhohna atan Carrington academy-a awmtir hi League Two vela nawr liam ai chuan a him zawk a ni. A lo thlen tirh khan Sapṭawng a thiam mumal lo a, classroom-ah zirin tunah chuan a thiam belh viau tawh mah se, lower league huang chhung khirhkhan takah chuan a tan buaina a tam thei dawn tlat a ni. Tun season hian Under-21 tan inkhelin, first-team training-ah hun a hmang tam dawn a, ram aiawha player lian te an chhuah lai khan Michael Carrick leh a thawhpuite hmuhah a theihna pholan theihna hunṭha a nei ta bawk.
Switzerland-a a hun hman khan Kana-Biyik hi a pui hle a, mahse a khup hliam avangin Lausanne tan match 26 chauh a inlan a, vawi 6 chauh bul a ṭan thung. He hliam avang hian Conference League qualifying match-te pawh a hmaih a ni. Substitute anga lut tlangpui mah se, bul a ṭan ṭumin goal a khungin assist a nei bawk. FC Sion laka goal a khung hnuah Swiss chanchinbu Blick hnenah, "A nuamin a hahdamthlak hle mai. Ka zalen hawk hian ka hria. Ka jersey hnunga ka hming pho lan kha ka rilrua lo lut hmasa ber a ni a, a pawimawh ber chu ka thiante leh fan-te nena hlim taka lawm kha a ni," tiin a lo sawi tawh a. Fiorentina laka a assist neih pawh a mawi hle a, veilam sir aṭanga defender bum tlangin cross ṭha zet a vawrh luh chu an goal phah a nih kha.
United kawr haa a inlan hmasak ber chu pre-season-a U21 tana Altrincham mual Moss Lane-a an khelh ṭum khan a ni a. Half-time-ah lutin minute 30 chhung mual veilamah a tlan kual a, a tlan chakna leh thahrui a neih ṭhat zia chuan club hotute mit a la nghal hle a ni.
Kana-Biyik hi Le Havre academy-a Paul Pogba leh Dimitri Payet-te lo inzir chhuahna hmun aṭanga rawn chhuak a ni a, striker leh winger-ah pawh a khel kawp thei a ni. Chu mai bakah, World Cup vawi hnih lo khel tawh Cameroon international hlui Andre Kana-Biyik-a fapa a ni bawk.
Brexit dan avangin kum 18 a tlin hnuah United hian an la chauh a ni a. Tunah hian senior team-a inlan ve theih ngei tumin theih tawp a chhuah chho mek a, United tan chuan player hralh chhuah theih tur mai bakah, first-team tana chhawr tlak ni thei tura an ngaih a nih avangin tun season-a a chetvel dan tur chu ngaihven a hlawh chho hle ang.
