Michael Carrick-a enkawl Manchester United chuan Pathianni tlai hian Old Trafford-ah an elpui lian Manchester City an mikhual dawn a, hei hi City manager Enzo Maresca tana he Manchester derby boruak lian a vawikhat tawnna tur a ni. Kumin nipui bazar chhung zawnga a hmabak a chian loh hnuah, United academy chhuak Marcus Rashford chuan he derby match pawimawh takah hian danglamna siam ngei a inbeisei hle a ni.

Season liam ta khan he winger hian Barcelona-ah loan-in hun ṭha tak a hmang a, Spain rama cham hlen pawh a duh hle a nih kha. Mahse Carrick-a ruahmannaah a inhlangkai leh ta a, United jersey hain khelmualah a theihna a pholang chho leh mek a ni.

United legend Gary Pallister chuan Betarades.gr hnenah thu sawiin, Rashford chu Manchester-ah "hun remchang vawihnihna" (second chance) pek a nih avangin hei hi a hman ṭangkai a ngai tih a sawi. Manager hlui Ruben Amorim-a hnuaia hmun chang lo Rashford hi kar khatah £325,000 ngawt hlawh a nih avangin United hian kumin nipui khan hralh chhuah an lo tum tawh a, mahse Old Trafford-ah a kir leh ta zawk a ni.

Pallister chuan, "Marcus-a'n a theihna sang ber a pholan lai leh contract thar a ziah lai khan Michael (Carrick) hi club-ah a awm ve a, Rashford hi a vannei hle a ni. Chu chu Michael-a'n a hriatreng ka ring. Contract a ziah hnu kum hnih velah khan hlim hmel a pu tawh lo a. Player pathum pali dangte nen squad hrangah dah a ni a, a nungchang leh a form pawh a ṭha lo a ni. Chuvangin a theihna phochhuah a chak em emna Barcelona a pan kha a khawi lam ve ve tan pawh a fuh hle a nih kha.

"Mahse Barcelona-ah contract a tluang ta lo a. Anthony Gordon an la a, England tan World Cup-ah khan position khatah an khel dun bawk. Rashford-a'n engtin nge a ngaih ka hre lo na a, United-ah hun remchang vawihnihna a dawng hi a vannei takzet a ni a, kut pahniha a chelh ngei ka beisei. Everton laka a khelh kha ka hmuh tawh zawnga a la khelh ṭhat ber ṭum a ni. Club hi a hmangaih tih ka hria. A thawhpui theih tur manager Michael-a hnuaiah a khel a, match thum hmasa berah khan a hlim hmel hle bawk. Player theihna nei ṭha leh hlauhawm a ni tih kan hria a. A hlim a, a tuihal bawk chuan Marcus Rashford hi mi tam tak Premier League team-ah a lang ngei ang," tiin a sawi.

Hemi rual hian United defender Lisandro Martinez pawhin Manchester City striker Erling Haaland nena an inhmachhawn ṭhin chungchang a sawichhuak a, mahse he inelna hi "thil kal tawh" a nih thu sawiin a ngaihnep hmel hle. Martinez hian City striker lakah hian vawi tam tak fiahna a lo tawk tawh a, season liam ta January thlaa Carrick-a'n lailawka mawhphurhna a lak ṭuma United-in 2-0 a hnehna an chan ṭum pawh khan Haaland hi a thunun hneh hle a nih kha.

Martinez chuan Haaland nena an inhmachhawn tur chungchang sawiin, "Kha chu thil kal tawh a ni a, a liam tawh. Tunah chuan he match atan hian ka inpeih a ngai a, a chhan chu an match hnuhnung ber ai khan a danglam dawn hle a ni," a ti.

City hian Champions League an khelh hma zawk avangin inbuatsaihna hun ni hnihin an ngah zawk a, mahse Europe inelnaa Sabah FK 5-0 ngawta an sawp hnuah Martinez chuan chhuanlam siam an tum loh thu a sawi bawk. "Hei hi kan duhthusam a ni, ni thum dan zela khelh a, inelna zawng zawnga inlan hi. Hun rei tak aṭanga kan lo duh ṭhin a ni a, tunah chuan kan inpeih tawh a ni. Taksate kan tihdam leh a ngai a, team anga kan thlen duh standard chu hei hi a ni," tiin a sawi belh a ni.