Ningani zan khan Manchester United chuan Champions League bul ṭannaah Sabah chu 4-0 in an sawp a, clean sheet an nei chu thil lawmawm tak a ni. Amaherawhchu, kar tawpah hian mualneitu niin Old Trafford-ah Manchester City an hmachhawn dawn a, Erling Haaland leh a thawhpuite chu Azerbaijan club aiin an hlauhawm fe dawn tih a chiang hle.
Tun season Premier League match thum an khelh tawhah United hian match tinah goal hnih zel an chhuah a. Hull City, Ipswich Town leh Everton te pawhin United tlarhnung hi vawi hnih ṭheuh an ṭhiah theih chuan, City tan pawh hlauhawm siam chu thil harsa a nih a rinawm loh. Michael Carrick-a'n Premier League match 20 a enkawl tawh zingah match 10-ah United hian goal hnih zel an chhuah a; chung zingah chuan vawi nga chakin vawi hnih chiah tlawm mah se, hetiang renga goal chhuah tam hi chu a ngaihtuahawm hle a ni.
Carrick-a coaching staff zingah hian tawn hriat ngah Jonny Evans leh Jonathan Woodgate te an awm a, tlarhnung venhim kawngah hriatna an nei ṭha hle. United centre-back hlui Jaap Stam chuan hei hi mimal thiam loh aiin team anga ṭanho tawk loh vang a nih a rin thu Manchester Evening News hnenah a sawi.
Stam chuan, "Inkhel thunun satliah mai ni lovin, chance pe lo tura tlarhnung lama inkhel thunun a ngai a ni. League title emaw trophy lak i duh chuan, team angin i ngheh a, khelh zawn theih (consistent) a ngai. Hei hi mimal theihna tlakchham vang nge team anga kan tihṭhat theih zawk tur thil? Team thil a nih ka ring zawk; tlarhnung venhim kawngah kan che ṭha zawk thei a, ball hnunga kir leh vat te, team pum anga inremkhawm a, chance pek loh te hi a pawimawh a ni. United hian goal an chhuah awlsam lutuk ṭhin a ni," tiin a sawi.
Season liam ta khan Harry Maguire leh Lisandro Martinez te chu Carrick-a centre-back thawhpui hmasak ber an ni a, Sabah lakah Leny Yoro a inlan bawk. Mahse City lakah chuan Maguire leh Martinez te bawk bul an ṭan leh a rinawm.
Chutih rualin Carrick-a la chhawr theih loh option ṭha tak a awm a, chu chu Dutch defender Matthijs de Ligt a ni. Ajax, Juventus leh Bayern Munich centre-back hlui hi hnungzang hliam vangin thla riat leh a chanve chhung zet a inkhel tawh lo a, mahse khelmuala kir leh turin a inpeih chho ṭep tawh a ni. A inhliam hma khan Old Trafford-a a awm chhunga a khelh ṭhat ber lai a hmang mek a ni.
Stam chuan kum 27 mi theihna hi fak bawkin, "Matthijs hian taksa chakna ṭha tak a nei a, tlarhnung aṭangin ball a chhuahpui thiam a, khingpuite tana paltlang harsa tak defender a ni. Midangte a kaihhruaiin a remkhawm (organise) thiam em em a, chu chuan team a ṭanpui thei hle ang," a ti.
Carrick pawhin hlawhtlinna an chan duh chuan goal chhuah tlem a ngai tih a hria a, nakkum nipuiah chuan tlarhnung thuamṭhatna lian tak an neih a rinawm. Left-back lakluh an ngaihven ber dawn a, Newcastle nena kum nga contract thar ziak mah se Lewis Hall chu an duh ber zinga mi a la ni reng. Stam erawh chuan full-back position pahnih hi ngaihtuah a ngai niin a hria.
Stam chuan Luke Shaw chu player ṭha leh tawn hriat nei ni mah se hliamin a tlakbuak fo avangin, Champions League khelh a ngaih leh takah chuan thlaktu tur player ṭha lak a ngai tih a sawi. Right-back-ah Diogo Dalot leh Noussair Mazraoui awm mah se, tlarhnung venhim lam thiam zawk lakluh a ṭhat a rin thu a sawi bawk. Centre-back-ah Maguire leh Martinez bakah rawlthar Ayden Heaven leh Leny Yoro te an awm a, tawn hriat an neih theih nana inkhelh hun pek an ngaih thu leh, Carrick chuan point hmuh leh chak a pawimawh ber avangin thutlukna dik a siam a ngai tih a tlip a ni.
