Manchester United player hlui Antony chu Premier League club lianin Ajax aṭanga an lakluh nana sum an thehchhuah zat £85.5million a chanve aia tlem chauh a hlut tawh thu TransferMarkt chuan a tarlang a, tunah hian a hlutna hi £34m chauhva chhut a ni tawh a ni. Old Trafford a thlen aṭanga kum li a liam hnuah pawh he Brazilian winger man hi Eredivisie chanchina player hralh to ber record a la ni reng a ni.
He Brazilian winger hi manager hlui Erik ten Hag-a'n a lakluh a ni a, mahse United-ah hun duhawm lo tak hmangin, 2024-25 campaign chanve velah Ruben Amorim chuan Real Betis lamah loan-in a chhuahtir ta a ni.
Kum 26 mi Antony hian Spain-ah a theihna rawn pholang tharin, match 26-ah goal kua khungin assist vawi nga a nei a, Betis chu UEFA Europa League khel thei turin a ṭanpui a ni. A dawt season-ah Spanish club Betis hian a nghetin an lalut zui ta a, a man nghet atan £19m pein a chet ṭhat dan azira pek belh theih (add-ons) £2.6m a awm bawk a ni.
Antony hian United-ah match 96 inlanin goal 12 leh assist vawi nga a nei hman a. Manchester chhuahsana Spain-a cham zui a thlan chu a career-a thutlukna ṭha ber zinga mi a nih thu a sawi hial a ni. Kumin tir lam khan ESPN Brazil hnenah Antony chuan, "Betis-a cham zui hi ka nuna thutlukna ṭha ber zinga mi a ni. Ka hlim takzet a, he thutlukna siam tur hian ka chhungkaw dinhmun pawh a pawimawh hle. Anni an hlim hian a pawimawh ber a, chhungkua an hlim chuan khelmual chhungah pawh thil a zangkhai phah ṭhin a ni," a ti.
2025-26 season khan a career-a goal khung tam ber season hmangin, game 46 a khelhah goal 14 a khung a, Betis chu kum 21 hnua a vawikhat nan Champions League khel thei turin a hlangkai a ni.
Manchester-a a hun hman liam chu "a harsa" tiin a sawi a, mipui sawiselna leh enbikna nasa tak a tawh chu a paltlang zo dawn em tih a inrinhlelh hial thu a sawi chhuak bawk. CBF (Brazilian FA) hnenah sawiin, "Ka tana thil pawimawh ber chu Pathian vawn tlat hi a ni. Hei hi ka ngaipawimawh em em a, ka chhungkua pawh ka ngaipawimawh hle. Dik tak chuan hun harsa ka tawh chhung khan keimah leh keimah pawh ka inringhlel hial a, he dinhmun hi ka paltlang thei dawn em tih ka inngaihtuah ṭhin a ni. Ka chhungte chuan inbengdai turin min hrilh ziah a, 'Inbengdai rawh, hei hi i paltlang tur a ni' tiin min hrilh ṭhin. Thil kalphung chu a na a, mahse kan pawm a ngai si a ni," a ti.
Sawi chhunzawmin, "Vawiinah hian ka thil paltlang tawh zawng zawng leh, beiseina awm tawh lo hnu pawha ka lo tawrhchhel theih dan te kha ka hrethiam ta a ni. Ka hna ka thawk chhunzawm zel a, club (Manchester United) tan khan theih tawp ka chhuah reng a, ka tihtur kha ka hlen chhunzawm zel bawk. Vawiinah hian hnunglam ka hawi let a, he thil paltlang hi a ṭul a ni tih ka hria. Puitling zawk leh inpeih zawk ka nih phah a, pa ṭha zawk, pasal ṭha zawk leh mihring ṭha zawk ka nih phah ta a ni. A man a hla takzet a ni," tiin a sawi bawk.
Antony hian tun season thar hi a ṭan muang hle a, Betis tana a match hmasa pangaahte goal emaw assist emaw a la nei lo a ni.
