Pathianni tlai hian tun season-a Manchester derby hmasa ber khel turin Manchester United leh Manchester City te chu Old Trafford-ah an inhmachhawn dawn a ni.

Kumin nipui bazar chhunga Pep Guardiola-a'n Manchester City a chhuahsan hnua an manager thar Enzo Maresca leh United head coach Michael Carrick te in-tactics tumna hmasaber a ni dawn a. He match thleng tur hma hian, kum 2017-a Old Trafford-a derby zawha team pahnih player leh staff-te inkhawih tak vanga Guardiola-a'n ngaihdam a lo dil tawh chanchin chu sawichhuah leh a ni bawk.

Manchester derby hi thil ribur leh buaina chhuah zinga inelna boruak sang tak mai a ni a, kum engemaw zat chhung khan buaina hrang hrang a lo chhuak tawh ṭhin. Chung zinga langsar ber pakhat chu kum 2017-a Guardiola leh Jose Mourinho te managerial battle neih lai kha a ni.

December 2017 khan Guardiola-a enkawl Manchester City chuan mualneitu United chu 2-1 in an hneh a, Nicolas Otamendi-a goal khung hmangin Premier League hmahruaitu City chuan United aiin point 11 zeta hma an hruai phah a nih kha.

Match zawhah City player-te chhung lam dressing room-a an lawm thawm leh boruak siam chu a uchuuk deuh nia hria United manager Jose Mourinho chu a lungawi lo hle a. City goalkeeper Ederson nen an inhnangfak hnuah boruak a hot chho takzet a, player leh staff 20 vel zet inrawlhin inkhawihna leh innam buaina rapthlak tak a chhuak ta a ni.

Kha buainaah khan Mourinho chu bawnghnutea vawmhmuh a ni a, Guardiola-a coaching staff-a mi Mikel Arteta phei chu inbualna/chawhna um (drinks container) a intaurang avangin a hmaiah hliam tenau a nei hial a ni. Hemi hnu hian Guardiola chuan Manchester United hnenah ngaihdam dil mah se, innek buaina thlentirnaah mawhpekluh erawh a pawm duh bik lo.

Guardiola chuan, "Hetiang hun ṭha hi chu kan hlimpui ve bawk tur a ni. Mipuiin an hrethiam lo a nih chuan ngaihdam ka dil e. Derby-ah kan chak a ni a, kan awm dan a dik lo a nih chuan Manchester United zawng zawng hnenah ngaihdam ka dil e. Tum lawk vanga buaina ti chhuak kan ni lo a, locker room chhunga hnehna lawm mai kha kan tum ber a ni," tiin a lo sawi a nih kha.

Ni hnih a liam hnuah, Bournemouth nena match an khelh hmaa chanchinbumite an kawmnaah Mourinho chuan Guardiola-a thusawi chu chhang lehin, "Ani chuan a sawi a ni mai a, a thusawi chungchangah hian sawi zui tur ka nei lo. Ka sawi theih awmchhun chu ka tan chuan nungchang zia inthlauhna leh zirtirna inchhawm inthlauhna mai a ni. He chanchinbu inbiakna hi Bournemouth match hmachhawn tur atana buatsaih a ni a, City match zawh a ni tawh lo," tiin a lo pawt tawi hmak thung a ni.

Tunah chuan hun dang a lo thleng a, team pahnih hian hruaitu thar an nei ve ve ta. Maresca-a enkawl Manchester City chuan season liam taa Old Trafford-a 2-0 a an tlawmna kha siphurh rulh tumin khualmual pan an tum dawn a ni. Season liam ta (2025-26) a he derby match hnuhnung berah khan Bryan Mbeumo leh Patrick Dorgu te goal khung hmangin Carrick-a nauten hnehna an chang a, league table-ah pathumna dinhmun an luah zui phah a nih kha.