Manchester United captain hlui Wayne Rooney chuan an captain Bruno Fernandes chu khelmuala a mawhphurhna pumpelh tura head coach Michael Carrick-a chunga pressure nasa tak nghattu tiin a sawisel ta hrep mai.

Rooney chuan tuna United squad-a player awmte chu naute (babies) nena tehkhinin, mahni hmasial tak leh mahni chauh inngaihtuah nia puhin a dem hle a ni. Champions League inkhela Como an hmachhawn ṭuma an inlan dan chungchangah Fernandes hian khelmual chhunga Carrick leh a coaching staff-te tactic hman dan chu mipuite hriatah a lo sawisel a nih kha.

Kar hmasa lama Atletico Madrid laka an tlawm hnu khan Lisandro Martinez chu an tactic chungchanga lungawi lohna lantirtu hmasa ber a ni tawh a. Mahse kar laia 4-1 ngawta an tlawm leh tak hnuah, an club captain Fernandes-a chetdan leh a mize phawrhchhuah chuan Rooney-a thin a khei ta ber a ni.

The United Stand-a a inlan tumin Rooney chuan heti hian a sawi: "Martinez-a'n khatiang thu a sawichhuah khan, dressing room a pawt darh vek dawn a, mangchhia rapthlak tak a nih tur thu ka lo sawi tawh a ni; kha kha a ṭanna chauh a la ni. Tunah Bruno-a lakah kan hmu leh a, player dangte pawhin an la ti chhunzawm zel ang, a chhan chu mawhphurhna lak an duh lo a ni.

"Bruno-a thusawi kha a dik emaw a dik lo emaw i sawi thei ang, mahse khelmual chhungah chuan mawhphurhna i lak a ngai a; player zawng zawng hian ṭanghovin mawhphurhna in lak a ngai a ni.

"Heng player-te hi mahni hmasial tak an ni. An team-mate te, an manager, coaching staff leh an fan-te pawh an ngaihtuah miah lo. Mahni chauh an inngaihtuah a ni. An duhzawng ang thila a kal loh chuan naute ang mai an ni a, an thil khalh lai an paih darh a, anmahni ni lovin midang mawhpuh tur an zawng nghal char char zel a ni," tiin a sawi zui bawk.

Fernandes-a'n tlang taka Carrick a sawisel dan chu Rooney chuan pawm harsa a ti hle a, "Amah ngeiin hmachhawn a duh loh avangin midang chungah pressure a nghat a ni. Darthlalangah inbihchiang se, Martinez leh an za vaia darthlalangah inen se chuan, an thil hmuh let tur chu anmahni ngei an ni ang a, chu chu a la ṭha tawk lo hle a ni; theihna sang zawk an phochhuah a ngai," tiin a sawi belh.

Como laka an tlawm hnu khan Fernandes chuan TNT Sports hnenah, "Man-to-man a press loh tur leh, a changa hnunglam ruak zawk siama ball lak tum tura lo nghah kha coaching staff-te thutlukna a ni a. Mahse hetiang team-te hnenah hian hmunawl i pek chuan an inrintawkna a sang sawt ṭhin a ni. Hei hi chu manager leh staff-te hmuh thiam tur a ni a, keima thil tur a ni lo," tiin a lo sawi a nih kha.

Fernandes-a thusawi hi Carrick pawhin rang takin a chhang let ve nghal a, "Second half-ah khan man-to-man in tlem chu kan press a, chumi aṭang chuan goal kan chhuah ta nghal a nih kha. Inkhelah hian system engpawh hmang la, tactic engpawh hmang rawh; i tlan peih lohva, hmalam leh hnunglama i tlan bawk si loh chuan chak ngaihna a awm lo," tiin a player-te thawhrim tawk loh zia a sawichhuak ve thung a ni.