Manchester United-in manager atana an beisei mek Eddie Howe chuan Selhurst Park-a Crystal Palace manager hna chelh tura dawrna a dawng chu a lo hnawlsak tawh nia report chuan a tarlang. Kumin nipui mai khan Palace manager hna hi Pierre Sage-a'n zawm mah se, Selhurst Park club hi Premier League-ah a mawngphah (relegation zone bottom)-ah an awm mek avangin a chhuak zui mai dawn nia hriat a ni.

Old Trafford-a Michael Carrick-a hmakhua a chian loh mek lai hian, Newcastle United head coach hlui Eddie Howe-a hming hi rawn ri langsar berte zinga mi a ni. Midfielder hlui Carrick-a hnuaiah United te hi tun season-a ram tana chawlh (international break) pahnihna an hmang ṭan tawh chungin relegation zone-ah an awm mek a, hei vang hian a lakah pressure a sang hle a ni. United hotute chuan manager thutlukna hi an ngaihtuah mek a, tun kar chhung hian ban tur nge ban lo tur tih thutlukna an siam tawh beisei a ni a, Guardian thuchhuah dan phei chuan hotute hi inthlakthlengna siam ngei turin an pen hnai hle nia tarlan a ni.

Tun season chhung ngeia Howe hi club danga a zawm a nih chuan, dawngtu club hian Newcastle hnenah zangnadawmna (compensation) £3million vel pe tur an ni ang, kumin nipui bawk khan Newcastle a lo chhuahsan tawh chung pawhin he inremna hi a la nung reng a ni. Kum 48 mi Howe hian kum nga dawn Newcastle a enkawl hnuah St James' Park hi July thla khan a chhuahsan a, club hi a theih tawk in a thlen tawh thuiin a inngai a ni. Thla liam ta khan Champions League khel mek French club Lens pawhin an manager Dino Toppmoller an ban hnuin Howe hi dawr mah se, ani hian a lo hnawlsak tawh bawk.

Newcastle a chhuahsan ṭum khan Howe chuan: "Ngunthluk taka ka ngaihtuah hnuin, Newcastle United head coach ka nihna aṭanga chawlh a hun ta a ni tih thutlukna ka siam ta a ni. Kum nga dawn tehmeuh phurna leh energy zawng zawng nena ka nun, ka thinlung leh thlarau club tana ka hlan hnuah, chawl hahdam a, chawlh lak rih hi keima tan leh club tan pawh a ṭha ber tur a ni tih ka hria. He thutlukna siam hi thil harsa tak ni mah se, thutlukna dik tak a ni tih ka thinlungin a hria a ni. Helai hmuna ka awm chhung zawng khan ka mimal duhzawng aiin Newcastle hmakhua ka dah pawimawh hmasa ber ziah ṭhin a, tun hian chutiang chiah chu a ni leh a ni. Newcastle United manager han nih hi ka damchhungin ka tan thil hlu leh ropui tak a ni reng ang," tiin a lo sawi tawh a ni.

Chronicle thuchhuah danin, Palace-in an dawrna hi Howe hian a hnawl a, inkhelh leh football huang aṭanga thla hla taka awma chawlh hahdam zel rih chu he kum 48 mi hian a la duh zawk a ni. Carrick-a hmunruak luah thei tur zingah hian Howe bakah Julian Nagelsmann, Antonio Conte leh Mauricio Pochettino te hming pawh thla tlemte liam ta chhung khan sawizawm an lo ni tawh bawk a ni.