Manchester Derby-a Manchester United leh Manchester City inkhelha VAR tihsual lian tak avanga United an tlawm zui takna chuan Premier League tan mualphona lian tak a thlen a, khawvel hmun hrang hranga infiamna chanchinbu lian te ngaihven ber a ni chho mek a ni.
Manchester City-in goal offside chiang em em an khung chu VAR lamin pawmin goal-ah an pawm a, referee lam enkawltu pawl Pro Ref (hmana PGMO tia hriat ṭhin) chuan Erling Haaland-a goal khung kha pawm loh tawp tur a nih thu nemnghetin United hnenah ngaihdam an dil tawh a ni. Mahse ngaihdam dilna hian United tan engmah a thlak danglam tawh lova, an tuar tur ang chu an tuar zo vek tawh a ni.
He thil thleng hian Premier League hmingṭhatna chu nasa takin a tichhe bawk a, Pro Ref hotu lu ber thlak danglam phutin awrawl a chhuak ṭan bawk. Khawvel pum huapa he chanchin an ziah dan hian Premier League tan a zahthlak zia a tilang chiang hle.
Spain chanchinbu lian AS chuan, "VAR chu inelna laili-ah buaina chawkchhuaktu a ni leh ta. Tun ṭumah chuan Premier League-ah a ni thung. Referee-te chetsualna avanga English football a alh phut hi a thar hran lo na a, a thar loh avang erawh hian thil ngaihtuahawm tak a nihna a nep phah chuang lo," tiin an ziak.
Marca pawhin mipui phurna leh thinrimna nasat zia tarlangin: "Mipui au thawm leh lungawilohna a nasa em em a ni. He inkhel boruak (derby match) leh an hriatfiah dan ngaihtuah chuan hetiang hi beisei lawk sa reng a ni: goal pawimawh em em, offside chiang tak ni bawk si chu pawmsak a ni a, a tuartu zawk chu Manchester United anga club lian an ni bawk si," tiin an tarlang.
Sky Italy chuan: "England lamah boruak a sosang hle: Referee enkawltu pawl Pro Ref chuan Manchester derby-a Haaland-a goal khung kha sut (disallowed) tur a ni tih an pawm ta," tiin an ziak bawk.
US lam aṭangin NBC Sports chuan na takin referee lam hi an sawisel ve bawk a: "Pathiannia Old Trafford-a Manchester City-in derby hnehna an chan theih nan VAR thutlukna chuan hmun laili a luah a ni. An sawisel hi a dik chiah: VAR hian thil an tisual chiang hle a ni. He thutlukna avanga United an thinrim hi a awm hle a, thil tihsual an pawm tawh hnuah hian VAR thutlukna siam dan phung hi zawhna zawh a, chhui chian ngei tur a ni," tiin an tarlang.
Premier League referee hlui Mark Clattenburg pawhin City goal hi pawm loh tawp tur a ni tih sawiin, Enzo Fernandez chu offside dinhmunah awmin inkhel a tibuai (interfering with play) a ni tiin a sawi chhuak bawk.
Premier League hmingchhiatna hi chu kar leh mai hian a la reh bo leh mai thei a, mahse point hloh phah ta Manchester United tan erawh a nghawng a na zawk hle. United manager Michael Carrick chuan United-in inkhel an thunun lai meka he goal an chhuah hian match kalphung a thlak danglam vek thu sawiin, point 3 hmuh theihna hunṭha an chân phah hial niin a ngai a ni.
City tana point thum hlu tak ni si hi United tan chuan an chhiatpui theih hial a ni ve thung. Season tawpah point khat lek vanga Champions League khel turin Red Devils te hi an tling zo ta lo a nih ngat chuan, an tana pawi em em mai he referee-te tlinlohna hi fan-te chuan an theihnghilh mai mai tawh dawn lo a ni.
