Manchester City-in Premier League sum leh pai inrelbawlna dan an bawhchhiat chungchanga thiam loh chantir an nih tak hnuah, Manchester United chuan an sum leh pai dinhmuna nghawng a neih dan chu uluk takin an enfiah mek tih hriat a ni.
Club mai bakah hian, United player-te pawhin City-in dan an lo bawhchhiat thin nia puh a nih chhung zawnga Champions League khel thei lova an lo awm tak avang leh title an chan tak loh avangin, zangnadawmna sum tam tham tak an phut theih dan kawng an dap mek bawk a ni. Player-te hian Champions League an khelh loh hian an kar tin hlawh chu zaa 25 (25 per cent) zetin tihhniam sak ṭhin an ni a, hei hian player tam zawk tan pound maktaduai tam tak hloh tlukpui a tling a ni.
Kum 2015-16 Premier League season khan City hian goal difference hmangin palina dinhmun changin Champions League khel turin United hi an lo lehpel tawh a. Chu bakah 2011-12 leh 2017-18 season-ah te pawh United hi an khawpui elpui City dawtah hian pahnihna an lo ni tawh bawk a ni.
The Athletic-in a tarlan danin, United hian City-in league an khar danin sum leh pai lama nghawng a neih nasat zualna season-te chu an thlirbik mek a. Premier League club dangte pawhin season hmasa lama City chet danin an hlawhtlinna tur a tibuai em tih an chhui ve mek bawk a ni. Club-te hian City hian hremna a tawk ta a nih chuan dan anga an dawn theih tur zat chu chhut chhuah tumin hma an la mek a ni.
Premier League dan bu 'Section W' hnuaiah hian club-ten chhiatna an tawh zangnadawmna phut theihna kawng a inhawng a, hei hi Burnley-in Everton laka £35m an khinnaa an lo hman tawh ang kha a ni. Premier League table-ah hian dinhmun pakhat chhoh hlek ringawt pawh hian £2m aṭanga £3m man vel a hu a. Champions League luh theih phei chu sum a tam lehzual a, league phase-a inlan ringawt pawhin £16million dawn theih a ni a, Europa League aṭanga hmuh theih £4million aiin a let thum aia tamin a tam zawk a ni.
United bakah hian Arsenal, Liverpool leh Tottenham Hotspur te chuan City hi thiam loh chantir a nih tak hlauha zangnadawmna phut theihna tur legal notice chu kum 2024 khan an lo thehlut tawh a ni. Independent commission chuan kum 2009-10 aṭanga 2017-18 inkar season kua (9) chhung khan City hian Premier League sum hman dan an bawhchhia tih leh, sum lakluh lem (sham deals) hmangin £900million zetin an sum lakluh an tipung lui tih an lo puangzar tawh a nih kha.
City lam erawh chuan thiam an la inti tlat thung a, commission thutlukna chu dan leh thudik kalha thil tih a nih thu sawiin judicial panel chair hnenah an khinglet (appeal) mek a ni.
The Athletic chuan United-in City umphak an tumna lamah sum tam tak an hman ral phah thu an tarlang tel bawk a. Alexis Sanchez-a contract to uchuak lutuk an pek khan David de Gea leh player dangte contract-ah nghawng ṭha lo a nei zui a. Cristiano Ronaldo lak let leh ṭum leh tun nipuia Elliot Anderson-a an inchuh ṭum pawh khan United hian City an lo el tawh bawk a ni.
