Manchester United rawlthar kum 15 mi JJ Gabriel-a'n Old Trafford chhuahsan a tum mek laiin, United legend Wayne Rooney chuan he rawlthar chhuah tumna hi lo thleng ngei ngei tur chi a lo nih tawh thu leh pumpelh theih a nih loh thu a sawichhuak.

Gabriel hian Manchester United-a a hmakhua leh kaisang tura kawngka a chiang lo nia a hriat vang leh club dinhmun mekah a lungawi loh vangin Old Trafford chhuahsan hi a tum a, Spanish club lian Barcelona leh Real Madrid te nen inbiakna an nei mek bawk a ni. Mipui leh supporter ṭhenkhat chuan he rawlthar chhuah tumna hi club hotute dem nan hmang mah se, player-a aiawhtute hian chhuah zawk hi an nawr tlat nia tarlan a ni.

'Stick to United' podcast-a a ṭawngnaah Rooney chuan Gabriel-a chhuah tumna hi a hma aṭanga lo hriat sa a nih thu a sawi. Rooney chuan, "A hnaiha awm tupawhin hei hi a rawn thleng dawn tih an hre sa vekin ka ring. Ka fapa Kai-a team-ah a seilen chhoh pui ṭhin avangin a ṭhanlen dan ka lo hmu ngun hle a ni. Manchester United-in club-a chelh tura an theihna zawng zawng, engkim an hlan chung pawhin, a rilruah Spain lama pan duhna a nei tlat a ni," tiin a sawi.

Rooney chuan sawi chhunzawmin, United-in he rawlthar theihna ngah tak hi player dangte laka danglam bika enin duhsakna hrang hrang an pe ṭhin tih a sawi. "Player dangte aia duhsakna pek hi thil thleng ṭhin a ni a, nu leh pate hnenah pawh chhawmdawlna chi hrang hrang pek an ni ṭhin. Everton-a rawlthar ka awm lai pawh khan chutiang duhsakna chu ka lo dawng tawh ṭhin a ni. Club tan pawh hetianga player ṭha ber berte chelh nan hian tih theih tawp chhuah a ngai ṭhin. Gabriel hi player ṭha tak leh naupang ṭha tak a nih avangin, chhuak tura a inbuatsaih ta mai hi a pawi ka ti hle a ni," tiin a sawi bawk.

He rawlthar leh a aiawhtute chetdan hian bituk pel hial khawpin United hotute thin a tirim nia sawi a ni a. Kar liam ta khan League Cup match-ah senior team tana a debut siampui ruahman ni mah se, Gabriel hi training-ah rawn inlan duh lovin he hun ṭha hi a bawhpelh zui a ni. Taksa lian lo tak nei he rawlthar tan hian tharum taka innuai ngai tlem zawkna Spain football chu a inmil zawk tura ngaih a ni bawk.

United hian Gabriel chelh nan hian an theihna zawng zawng seng mah se, naupang lamin Spain lam pan an rilruk nghet tlat thung. Chuvang chuan United hian an hmakhua atana Old Trafford-a cham zui zel duh Kai Rooney, Jaice Dore, leh Noah Ajayi te anga academy player-te chungah an rilru an sawrbing a ngai ta zawk a ni. Manchester United hian Gabriel-a hmunruak luah tur atan hian French Ligue 1 club Lens aṭangin rawlthar theihna ngah tak Mezian Mesloub lakluh an tum mek bawk.