Premier League season thar match nga an khelh hnuah, Manchester United chuan nipui transfer bazara an chet danin a nghawng chhe lam a rawn phawrh chhuak ṭan a ni. Kumin nipui chhung khan an midfield thuam ṭhat chu an ngaihpawimawh ber a ni a. Casemiro chuan a thlawnin (free transfer) club a chhuahsan a, United squad-ah laili luah thei Manuel Ugarte leh Kobbie Mainoo chauh an kawl a nih kha.
Ugarte-a'n hliam na tak a tawrh hma pawh khan Old Trafford ruahmannaah a tel lo hrim hrim a, chuvang chuan sum tam tak sen a ngai ta nge nge a ni. Hemi kawngah hi chuan United hi an fakawm hle a, Andrey Santos, Youri Tielemans leh Carlos Baleba te chu lalutin Michael Carrick-a tan tlar laili thuam chakna tur an pe fel thlap a ni.
Mahse, an sum hmanna chu hetah hian a tawp ta thung. Left-back lakluh an tum zui a, hun tawp dawnah Rayan Ait-Nouri dawr hman mah se he position hi an thuam chak zo ta lo. Tlar laili buaipui an buai lutukna lamah centre-forward position an theihnghilh ṭhak bawk. Joshua Zirkzee hralh chhuah an tum laiin, a thlaktu tur lak hman a nih tak loh avangin he Dutch striker hi a la cham zui ta a ni.
Luke Shaw-a hliam vanga a chawlhna chu tlem tiziaawm tawhin a rawn kir leh tawh a. Mahse tlarhma lamah Benjamin Sesko chuan May thlaa a chawn ruh (shin) a tihhliam avangin pre-season match zawng zawng a khel thei lo a. Tun thlengin minute 90 pumhlum a la khel tling lo va, a damchian theih nan Slovenia national team aṭang pawhin a inhnukdawk hial a ni.
Tun dinhmunah Carrick-a naute hian hmun ruak hnawhkhat tura mi hrang hrang an thlak kual a ngai a. Amad Diallo a inhliam bawk si avangin Bryan Mbeumo chu a khelhna pangngai mual dinglamah a awm a ngai a, Matheus Cunha chu tlarhma laili (centre-forward)-ah an chhawr chhin a, mahse hei hian awmzia a nei tehchiam lo a ni.
Zirkzee an rintawk loh bakah Mbeumo chu dinglama a khelh a ngai si a, Cunha lah striker-ah a talbuai bawk nen, January thla hmain United hian tlarhma thuam nan hma an lak vat a ngai a ni. Manchester Evening News chuan tun dinhmuna United-in an lak theih tur free agent striker pathum a thlirlet a ni:
1. Karim Benzema (Kum 38)
Benzema hi a vanglai ang kha a ni tawh kher lo mai thei a, United tan Ballon d'Or dawng thei tur lakluhna a ni tawh lo. Mahse he French striker hian team-ah theihna sang tak a rawn belhchhah thei tho a ni. August thla tawp khan Saudi Pro League club Al Hilal nena an contract chu inrem takin an tihtawp hnuah a chhuak a, kumin hian match 10-ah goal 9 a khung hman a ni. United tana buaina tur erawh chu kum 2030 thleng Saudi league nen 'ambassador role' a ziahnaah a image rights an chelh tlat a. Lyon pawhin lakluh an lo tum tawh a, mahse he ambassador thil avang hian an inbe thei ta lo a ni.
2. Mauro Icardi (Kum 33)
Mak tak maiin Icardi hian tun thlengin club thar a la nei lo. Season liam ta khan Galatasaray tan goal 14 a khung a, a contract a zawh hnuah a chhuak ta a ni. Argentina lam pana haw a tum lo va, Europe-a la khelh chhunzawm zel a duh a. Tottenham pawhin an ngaihven nia sawi a nih laiin dawrna tak tak erawh a la awm lo. Kum lama a la puitlin ṭhat bakah, he international break chhung hian lakluh hman a nih chuan Carrick-a hnuaiah a taksa inbuatsaihna (fitness) siamrem nan hun a ṭha tawk hle a ni.
3. Joselu (Kum 36)
Stoke City leh Newcastle striker hlui Joselu hi Premier League a chhuahsan hnuah nasa takin a insiamṭha a. Espanyol-a a chet ṭhat hnuin kum 2023 khan Real Madrid-ah a kir a, 2023-24 season khan goal 17 ngawt a khung a nih kha. Qatari side Al-Gharafa a chhuahsan hnuah free agent a ni mek a. Icardi aiin a taksa a lianin a sang ṭha zawk a, Sesko-a chawlh chang pawha tlarhma hmawr bawk nan a remchang hle a ni.
