Manchester United leh England striker ropui Wayne Rooney chuan a fapa pali (4) te chu ama hnung zuiin professional footballer an rawn ni vek thei ang em tih a chian loh thu a sawi chhuak.
He Manchester United legend hian a sulhnu ropui tak chu a fate'n an rawn chhunzawm theih dawn em tih kawngah beiseina sang lutuk siamsak a duh lo a. Disney+ documentary thar, Britain-a chhungkaw lar berte zinga mi chanchin tarlannaah Rooney hian a nihna tak pholangin a nunphung a tarlang dawn a ni.
Tun dinhmunah chuan Wayne leh a nupui Coleen-i te fa zinga full-time football contract ziak thei awmchhun chu an fapa upa ber Kai a la ni a. Kum 16 mi hian kum 12 mi chauh a nih laia Puma sponsorship contract lo ziak tawh niin, United youth squad-ah a zinkawng a chhunzawm mek a ni. Kum 13 mi Klay pawh a u Kai-a awmna United academy-ah hian a awm ve mek bawk a, a nau dang pahnih kum 10 mi Kit leh kum 8 mi Cass te pawhin khelmualah theihna ṭha tak an nei chho mek bawk.
Mahse, The Guardian-in an fapa palite chu professional player an rawn ni chho vek thei ang em tiin an zawh khan, Rooney chuan zawi tein, "Ka hre lo le," tiin a chhang a ni.
England international hlui hian a fate lakah nawrna (pressure) rit tak nghah a duh loh zia a hriatthiam theih hle. A khelh chhung zawng khan Rooney hian club tan match 764 khelhin goal 313 lai a khung a, England tan vawi 120 ngawt a inlan bawk a ni. United-ah hian Premier League title vawi 5 leh Champions League vawi khat chawiin, a pumpuiah trophy lian tham 16 zet a chawi a ni. He documentary tharah hian Rooney hian a fapa palite hi uluk taka coaching a pek bakah, an in hnung lam huana football an khel ho ṭhin lai pawh hmuh theih a ni ang.
Kai hi a kum ngaihtuahin United-ah hian a aia upate rualin a inlan mek a, Under-18 Premier League-ah goal hnih khungin assist vawi khat a nei tawh a ni. A pa club hlui tana hma a sawn chhoh hle lai hian, he Old Trafford hero hi a fapa upa ber inkhel en lo tura hriattir a lo ni tawh ṭhin thung.
Kum 2024-a "I'm a Celebrity...Get Me Out of Here!" show-a a inlan ṭum khan, Wayne-a nupui Coleen chuan Wayne-a hmingthanna leh lar lutukna avangin an fapain muala hma a sawn dan en chu thil harsa a nih ṭhin thu a lo sawi tawh a. Coleen chuan, "Naupangte nena hun hman chhuah hi a harsa ṭhin khawp mai. Grassroots tournament vel an khelh lai khan Wayne chu inkhel rawn en tawh lo turin Kai-a'n a ngen hial a ni, a chhan chu mipuite'n an bawr buai luai luai ṭhin a, inkhel pawh a thlir hleithei ngai lo. Naupang lo kal khawmte hnenah chuan, 'Lo kalsawn rawh u, ka fapa inkhel ka en duh,' han tih ngawt theih a ni si lo.
"Puitlingte chu nise kan be thei mai a, naupang chu a theih ve tlat loh. Chuvangin Kai chuan, 'Ka pa, inkhel min en theih chuang bawk si loh chuan lo kal buai lo mai rawh,' a ti ta ngawt a ni. Thil lungchhiat thlak tak ni mah se tihngaihna a awm bawk si lo a. Chutih rualin fan-te hi tuna kan dinhmun min thlentirtu an ni tho bawk si," tiin a lo sawi tawh a ni.
Heng an chhungkaw chanchin thuk zawk pholanna tur 'The Real Rooneys' tih documentary hi episode 10 awmin, September ni 24, Ningani hian Disney+-ah tihchhuah a ni ang.
