Aston Villa nena Premier League match an khelh ṭuma head coach Michael Carrick-a'n full-back Diogo Dalot a lakchhuah tak avangin Old Trafford-a mualneitu fan-te chuan an au el a. Hemi hnu hian Manchester United substitutes' bench-ah Joshua Zirkzee chuan he defender hi a hnem zui a ni.

Second half inlaichhuan vel khan Carrick chuan player thum inthlengin, Dalot-a thlak tur hian Patrick Dorgu a rawn luhtir a; hemi rual hian Amad leh Youri Tielemans te la chhuakin Mason Mount leh Shea Lacey te a luhtir bawk.

Half-time-ah Harry Maguire thlakin Ayden Heaven a rawn lut tawh a, hemi hnuah Bryan Mbeumo thlakin Zirkzee ngei pawh hi khelmualah a rawn lut a ni. Khelmual a rah hnuah Dorgu-a ball siamsak aṭangin Zirkzee hian United goal thumna a khung a, hemi hnu hian Bruno Fernandes-a corner kick aṭangin assist petu Dorgu chuan goal a rawn khung ve leh a, United tan point khat a hlawhchhuahsak ta a ni.

Substitutes' bench aṭanga a rawn luh hma minute 15 velah, Zirkzee hi a ding chhuak a, dugout-a rawn lut Dalot hi kuahin a lo hnem a ni. Second half inṭan aṭanga minute thumna lekah Dalot hian box chhungah foul neiin penalty a chhuah a, hei hi John McGinn chuan thun zuiin Aston Villa chuan hma an hruai phah a ni.

Zirkzee hian Old Trafford-a mualneitu fans-te laka au el hlawh chu a man a hrethiam em em a. December 2024 tawp lamah khan Newcastle United 2-0 a an tlawm ṭum khan, match inṭan aṭanga minute 30 vel chauh a liam tihin mipuite'n an lo au el tawh a ni. Kum hnih dawn a liam hnuah Zirkzee chuan Dalot-a dinhmun hrethiamin a ṭanpui ta thung.

Inkhelh zawhah Carrick pawhin a player hi a chhan nghal a. Au elna chungchang zawhna chhangin Carrick chuan, "Hetiang thilah hian kan fimkhur a ngai in ka hria. Fans-te rilru beidawnna leh an lungawi lohna chu ka hrethiam em em a ni. Kan vaia beidawng leh lungawi lo kan ni a, player-te pawh an lungawi bik lo tak zet a ni, chu chu ka tiam ngam che u. Diogo hian theihna zawng zawng a hlan ziah a, position hrang hrangah a khel a, veilam sirah (left-back) te khelin hun ṭhenkhatah phei chuan a khel ṭha em em ṭhin.

"Vawiin khan penalty a chhuah a. Hemi aia ṭha zawk hian a ti thei mai thei, chu chu thil awm ṭhin a ni; tihsual a nei ngei a, mahse team a ngaihpawimawh em em a, a theihna zawng zawng a hlan a ni. Chuvang chuan team tana a rawn thlen ṭhinte, kan squad boruak tana a thawhhlawknate leh kan rilru puthmang tana a rawn thlen hi ka ngainat zawng tak a ni. Team thlan leh match danga khel tur thlan erawh thutlukna dang daih a ni a, nakina kan match hmachhawn tur chu inbuatsaih leh zawk a ngai a ni," tiin a sawi bawk.

Tun season chhungin Dalot hi inelna hrang hrangah United match khelh zawng zawngah match khat tih loh chu a inlan kim vek a, Premier League fixtures-ah match hnih tih loh chu bul a ṭan vek a ni. Carrick-a'n a sawi angin, he full-back hian tlar hnung veilam leh dinglamah te a khel kawp a ni.