Manchester United defender hlui Marcos Rojo chuan a club khelhna mek Racing Club-ah training neih a hnar (refuse) a, a club hlui Estudiantes zawm leh tumin a nawr mek niin Manchester Evening News chuan a tarlang.
Kum 36 mi Argentina defender hian a football zinkawng a lo ṭan tawhna club ngeiah a career khar a duh thu a sawi a, hetiang thil a beisei avang hian a awm mekna Racing Club chhuahsan tumin theih tawp a chhuah a ni. Mahse, club chhuahsan a tumna hian Racing club hotute leh thuneitute lakah lungawi lohna nasa tak a siam a, meeting an neihnaah pawh inhnialna lian tham leh boruak sa tak a chhuah phah ta hial a ni.
Rojo hian a football hun hnuhnung lam hmang chho mekin, a professional football zinkawng a ṭanna hmun ngeia tawpna siam chu a suangtuahna pakhatah a nei a. Estudiantes aṭanga rawn inzirchhuak leh professional football hmel hmu hmasa ber a nih ang ngeiin, a career chu he club-ah ngei hian khar a duh a ni. Hemi avang hian Racing Club nena an inlaichinna chu a chhe chho hle a, a chhuah theihna tura kawng an sial duh loh avangin training neih pawh hnar zuiin luhlul a chhuah chho ta a ni.
Racing Club hotute nena an inbiakna leh meeting an neihnaah pawh hian boruak a rit hle a, inremna siam a hnehin thinurna leh inhnial buaina lian zawk a chhuak zawk a ni. Racing lam hian an defender hi awlsam taka chhuahtir an tum loh laiin, Rojo thung chuan training zawm duh lovin khelmual pawn aṭangin chhuah a nawr zui ngar ngar thung.
Manchester United-a lo khel tawh defender Marcos Rojo-a chetdan hian Argentina football-ah thawm a nei lian hle a. Kum 36 mi a nih tawh avangin football a khelh chhunzawm theih hun a tlem tawh tih a inhria a, chuvang chuan a hmabak tlemte chu a thil duhna hmun ngeiah hman a tum ruh hle. Estudiantes pan theih dan kawng hi Racing Club hotute nen an la chinfel theih loh cheu chuan he buaina hian zual lam a pan zel rin a ni a, training zawm duh lova a nawr tlatna hian club pahnihte inkarah engtiang chiahin nge nghawng a neih zel dawn tih chu thil thlir reng hlawh tak a tling chho mek a ni.
