Ruben Amorim-a'n Old Trafford a chhuahsan hnu kumin tir lam khan Michael Carrick chuan lailawkin (interim) Manchester United manager hna a chelh ṭan a ni. Season liam ta khan United hi pathumna a nihpui bakah Champions League khel turin a tlingpui a, hemi hnu kumin nipui khan club hotute chuan a hna hi an nghetin an ziahpui ta a ni.
Mahse tun season-ah United hi an che hleithei lova, kar tawp liam ta khan Chelsea laka 2-0 a an tlawm hnuin Premier League table-ah 17-na dinhmunah an tla thla a, relegation zone aṭangin goal difference chauhvin an fihlim mek a ni. Inelna hrang hrangah a zawnin match pakua ngawt hnehna chang tawh lo an nih avangin kum 45 mi Carrick-a lakah hian pressure a sang chho hle.
Middlesbrough a chhuahsan hnua thla sarih chhung chawlh a neih hnuah Carrick hian United hna hi a pawm a. Thla liam ta khan United midfielder hlui Nicky Butt chuan podcast-ah Carrick nen an inbiakna a lo sawichhuak a, Carrick-a'n management huanga kir leh a tum tawh loh thu a sawi angin a tarlang a ni. Butt chuan, "Man United hna a chelh hmain Michael hi ka be a. Ani chuan manager hna chelh chu a thawkrimthlak tiin Man United anga club lian an nih loh chuan zawm a tum rih loh thu a sawi," tiin a lo sawi tawh a ni.
Carrick-a dinhmun a derthawn mek lai taka hetiang thu rawn chhuak hi Manchester United hotute chuan an lawm lo hle nia tarlang a ni a. Hemi hnu hian Butt chuan 'Piers Morgan Uncensored' show-ah sawifiahna siamin, Carrick-a'n United hna chelh a duh lo anga ngaihna awm chu a tichiang ta a ni.
Butt chuan padel an khelh dun zawha beer in paha an inbiakna chungchang sawiin, "Padel kan khelh dun zawhin a hmakhua ka zawt a. Ani chuan club te zawka lirthei hmanga zin kual sek ngai hna chu thawh a chak rih loh thu leh, Man United anga club lian ber a nih erawh chuan pawm nghal a inhuam thu a sawi a ni. Carrick-a'n United hna a duh lo ti a sawi ka ni lova, hna satliah thawh ngawt a duh lo zawk a ni," tiin a sawifiah a ni.
Carrick pawhin thla liam taa chanchinbumite a kawmnaah he thu hi lo chhang tawhin, "Chutiang chu nise helaiah hian ka awm dawn lo hrim hrim a ni lawm ni? Tun dinhmunah hi chuan hei hi ka tana hna ṭha ber leh mawhphurhna lian ber a ni a, he club-ah hian hlawhtlinna neih a, danglamna thlen hi ka duh ber a ni. Hun harsa kan hmachhawn mekah hian a aia ṭha zawk thleng tura ṭan lak hi ka nuam tihtawng a ni a, kan kaltlang thei ngei ang," tiin a lo sawi tawh bawk.
United hian Thawhlehni zanah Champions League match-ah Old Trafford-ah AS Roma an mikhual dawn a, hemi hnu Pathianni-ah Premier League match-ah Aston Villa an hmachhawn zui leh ang.
