Manchester United goalkeeper hlui David de Gea leh football khawvel chuan CD Tenerife striker Jesús de Miguel-a thihna avangin sunna thu an sawi hlawm.

Kum 30 mi De Miguel hi Thawhṭanni-a Spanish second division-a CD Tenerife leh Andorra ten match an khelh ṭuma Andorra goalkeeper Jesús Owono-a khup (flying knee)-in a lu-a a chhuih fuh avangin lu hliam na tak a tuar a ni.

Match inhmachhawn mekah 2-2 a an inhnehtawk laiin he vanduaina hi a thleng a, he incident avang hian match pawh ṭhulh chhunzawm nghal a ni. Spain-a report-te tarlan danin, damdawi in panpui a nih meklai hian a lung a chawl (cardiac arrest) a, intensive care unit (ICU)-ah enkawl nghal a ni. Tenerife chuan thuchhuah pahnih siamin, a tirah chuan a dinhmun tihnghet (stabilized) anga tarlang mah se, Thawhlehni zinga thuchhuah pahnihnaah a thluak lam dinhmun (neurological condition) a zualkai zawk thu an nemnghet a ni.

Hemi hnu darkar tlemteah Tenerife chuan De Miguel-a boral thu rapthlak tak hi an puang ta a. Club thuchhuahah chuan, "Rilru na tak leh lungchhe tak chungin, he thil hi thil thleng a ni tih pawh kan awih thei lo zawk a, November 3, 2026 Thawhlehni zing dar 8:00 khan Jesús de Miguel Alameda-a'n min chhuahsan ta tih CD Tenerife aṭangin hriattirna rapthlak tak kan rawn siam a ni.

"Lungngaihna nasa tak min tuamtu chhawk zangkhai thei tur ṭawngkam hnemna thlum tak a awm lo; he thil lungchhiatthlak tak avanga lungchhia leh ṭap mek a chhungte, a hmangaihte leh tinerfeñismo mipuite hnenah kan awm tlat a ni," tiin an ziak. Chu mai bakah a chhungte chuan ṭawngkam hnemna zawng zawng avanga lawmthu sawiin, he hun harsa takah hian an mimal awmna (privacy) zahsak tura ngenna an siam bawk.

Manchester United goalkeeper hlui David de Gea chu he chanchin lungchhiatthlak tak laka zahna chibai buktu hmasa berte zinga mi niin, social media-a an thuchhuahah lungchhiatna leh ṭawngṭaina emoji hmangin a chhâng a. Andorra neitu leh he match entu Spain player hlui Gerard Pique pawhin, "Ka thinlung zawng zawngin ka pawi ti takzet. Jesús, thlamuang takin chawl ang che," tiin hnemna thu a ziak bawk. Hemi bakah European club lian Liverpool, Norwich City, Ajax, Napoli leh Marseille te pawhin condolence message an thawn a ni.

Andorra club pawhin thuchhuah siamin, "Rilru na leh beidawng tak chungin, Jesús de Miguel-a chhungte, a khelhpui thiante leh CD Tenerife-a mite hnenah kan thinlung zawng zawngin kan taksa leh rilru inzawmna kan rawn thawn a ni. Thlamuang takin chawl ang che," tiin an ziak a. An hmachhawn tur Badajoz club pawhin ṭawngkam hnemna leh zahna chibai an buk bawk.

Kum 2025 khan De Miguel hi Tenerife-ah a lut a, Spanish third division aṭanga an kaisang theih nan match 29-ah goal 11 khungin player pawimawh tak a lo ni tawh a ni. Tun season-ah hian bul ṭan (start) lo mah se, substitute-in vawi engemaw zat a lo inlan tawh a ni.