Manchester United tan tun season hi an ruahmanna angin a kal ṭha lo hle a, Premier League match sarih khelh tawhah vawikhat chiah chaktin, 13-na dinhmunah an awm mek. Red Devils hi EFL Cup aṭangin an chhuak tawh a, Champions League match pathum an khelh tawhah vawi hnih an tlawm bawk a ni.
Midfield-ah £150m chuang seng tawh mah se, United hian kreativiti lamah buaina an la nei char char a. Barcelona aṭanga loan-a a khelh ṭhat hnuah rawn kir leh Marcus Rashford pawhin team-ah nghawng a la nei thui thei lo a ni.
Hemi bakah hian an captain Bruno Fernandes-a form tlakhniam pawh ngaihtuahawm tak a ni a, a bikin tun season tawp hian a contract a zawh dawn avangin a thlaktu tur an ngaihtuah lawk a ngai ta a ni. Thla liam ta khan kum 32 a tling ta chiah a, English club lian hian a thlaktu tur hmun pui tur an zawng ṭan ta a ni.
Tunah hian an captain thlaktu tur hi Bundesliga lamah an hmu ta niin a lang. TEAMtalk tarlan danin, United chuan Bayern Munich rawlthar Lennart Karl-a dinhmun hi uluk takin an thlithlai mek. TEAMtalk-in thudawnna aṭanga a tarlan danin: "Arsenal, Liverpool leh Manchester United-te chu Bayern Munich-a Lennart Karl-a dinhmun chungchangah hian an ralring tlang hle a, German rawlthar hi a dinhmun a ṭha chho lo a nih chuan kum 2027 hmachhawn chhohah player ngaihven hlawh berte zinga mi a rawn ni thei ang," tiin a tarlang.
Senior team tana season liam taa a chet ṭhat em avangin, inelna hrang hrangah match 40 inlanin goal 9 a khung a, midang pet luh tur vawi 8 a siamsak a nih kha. Kum 18 mi Karl hi kumin tir lam khan club tam takin an ngaihven a, mahse an offer-te hnawlin Bavarian club nen hian contract thar an ziak ta zawk a ni.
Mahse, tun season-ah hian Karl-a tan first-team-a inlan a harsa ta hle a, inelna hrang hrangah match 9 inlan tawhin goal 1 leh assist 1 chiah a la nei a, vawi thum chiah bul a ṭan a ni. Ismael Saibari a chet ṭhat em avangin Karl-a dinhmun hi a tlakhniam phah a, hei bakah hian khelmual pawna a nungchang ṭhenkhat avangin Bayern hotute an lungawi lo hle bawk.
He buaina avang hian Bayern Munich legend Uli Hoeness pawh a rawn ṭawngchhuak hial a ni. Bavarian club honorary president hian BILD hnenah, "Amah nen hian thu tak zawka inbiakna neih ka tum a ni. Ani hi superstar a la ni teuh lo. Player naupangte hian inngaitlawmna an mamawh a ni. [Michael] Olise nena an in-tehkhin ṭhin hi a tana ṭha lo ber a ni a, an pahnih inkarah hian thlauhna lian tak a la awm," tiin a sawi.
TEAMtalk tarlan danin player aiawhtute (intermediaries) pawhin kum 2027 transfer atana dawr theih a nih dan tur chungchangah club dangte an be ṭan ta a ni. Karl-a dinhmun hi Bayern-ah a ṭha chho lo a nih chuan market-ah a hming a langsar chho hle dawn nia ngaih a ni. Real Madrid leh Barcelona pawhin he German attacking midfielder hi an ngaihven ve reng bawk.
Jadon Sancho-a buaina lo thlen tawh dan thlirin, Bundesliga aṭanga rawlthar khelmual pawna buaina nei leh thei tur lakluh hi United tan chuan tihnawk thei tak a ni a. Karl hi squad-a sengluh tur chuan player phurawm tak ni mah se, INEOS leh United board-te hian a chanchin leh mizia uluk takin an zir chiang hmasak hle a ngai dawn a ni.
