Manchester United boruak rit tak karah, Premier League chanchina an season bul ṭan chhiat ber tawng mektu head coach Michael Carrick chu dinhmun derthawng takah a ding mek a, ban a hnaih hle nia tarlan a ni.

He inkhelah hian Carrick hian boruak rit tak tizangkhai thei turin hnehna a mamawh em em a, a theih loh tawp pawhin team inpekna leh khelh ṭhat a mamawh takzet a ni. Mahse a United player-te chuan he thil pahnih hi pakhat mah khelmualah an lantir thei lo a, mahni mual Old Trafford-ah Bournemouth lakah 3-0 ngawtin an tlawm ta zawk a ni.

Old Trafford-a mual chhung boruakah fan-te chuan club tana sulhnu lo nei tawh club legend Carrick chu chhuang takin kut an beng a, mahse player-te leh club hotute (board) lakah erawh an lungawilohna nasa tak an au chhuahpui zui thung a ni. Chutiang boruak karah chuan Carrick ngeiin a hna chanin a tuar hmasak ber a ngaih hmel hle ta a ni.

Carrick ban tura thutlukna siamtu tur hi chief executive Omar Berrada leh technical director Jason Wilcox te an ni dawn a, anni pahnih hi Old Trafford-ah inkhel enin an awm dun nghe nghe a ni. Sky Sports broadcast-ah pawh Berrada hi team khelh dan beidawnthlak tak avanga lungawi lo taka lu thing nawk nawk lai hmuh theihin a lang chhuak hial a ni.

Berrada leh Wilcox te hian head coach ban a nih theih nan Sir Jim Ratcliffe hnenah rawtna (recommendation) an thehlut dawn a, Ratcliffe-a'n Carrick ban phalna hi a hnen aṭangin an dawng ang. Thil theih awm pakhatah chuan Ratcliffe hian a ṭul a tih a nih chuan Carrick mai bakah City mi hlui Berrada leh Wilcox te pawh hi an hna aṭanga a ban tel vek theih a ni bawk a, Manchester City mi hlui an nih avanga ngaihṭhatlohna nei lian tak United ṭantute pawhin heng hotu pahnihte chhuah hi an duh hle a ni.

Sky Sports tarlan danin, Bournemouth nena an inhmachhawn hma daih tawh khan United hian Michael Carrick-a thlaktu tur dang an lo melh lawk tawh a ni. Sky Sports chuan, "United hotute chuan tunah hian chu hmalakna chu an tichak zual sauh dawn a, club chhungril thudawnnate (insiders) beisei dan chuan Carrick hi a mawhphurhna aṭanga chawlhtir a nih ngei an beisei a ni," tiin an tarlang.

Inkhelh zawha a hmabak chungchang an zawh khan, Carrick chuan a hmalam hun turah "engmah beisei ka nei lo" tiin a chhang a. Mahse match zawha Old Trafford tualzawla a kal kual vel dan leh a hmel landan aṭang khan United-a a hun a tawp tawh tih inhre sa mi a ang hle a ni.

Como laka an tlawm hnu phei kha chuan United In Focus-in Carrick thlak theitu tur mi 11 zet an lo thlithlai tawh a, manager thar lakluh tura hmalakna hi kal mek sa a nih tawh ngei a rinawm hle a ni.