Manchester United manager Michael Carrick chuan an captain Bruno Fernandes-a'n a tactics a sawisel avanga ngaihdam a dil leh dil loh chu sawi chian duh lo mah se, thil thleng chu theihnghilhin "kawng ṭha lam" an pan dun tawh tih chiang takin a sawi.
Thla liam ta khan Champions League inkhelah Manchester United chu Como laka an tlawm hnuin, Fernandes hian Carrick-a tactics hman dan chu a lo sawisel a. He a thil sawi hian nghawng nei nghalin, a dawt chiah inkhelah chuan bench-ah ṭhuttir a nih phah ta a ni.
Old Trafford-a Bournemouth an hmachhawn ṭum khan United captain hi bench-ah ṭhuttir niin, khelmualah luhtir a ni lo hrim hrim a. Hemi hnu hian Carrington training ground-ah Carrick leh Fernandes te hian boruak tihziaawm nan inbiakna fal an nei a, Chelsea an hmachhawn leh ṭum chuan starting lineup-ah koh luh a ni leh ta a ni.
Kar tawp hian Aston Villa an hmachhawn dawn a, he inkhel thlirhona chanchinbumite hmaah Carrick-a hian he thil thleng chungchang hi zawh a ni leh a. Mahse United boss hian Portuguese midfielder hian ngaihdam a dil em tih erawh nemngheh a tum lem lo.
Carrick chuan, "Inbiakna hi a awm reng ṭhin a, thil thleng a awm bawk. Kha mi ṭuma ka sawi tawh ang khan, thil a kal tluang em, group anga kan siamṭhat ngai te hi hriatthiam a ngai ṭhin; a changin mimalin a ni a, a changin group anga sawiho a ni ṭhin. Sawiho hi kan nei reng a. Chu inbiaknaa kan thusawi tak erawh keima hriat atan ka vawng ṭha zawk ang e. Mahse kawng ṭha lam panin kan kal dun tawh tih a chiang hle a, Bruno-a inpekna leh he team leh club tana a thil rawn thlen theih hi rinhlelh rual a ni lo; chu chu tun kar chhung pawh khan a rawn pholang leh a ni," tiin a sawi.
Carrick chuan sawi chhunzawm zelin, "A chetzia te, a khelh dan leh penalty pet nawn a ngaih ṭuma a thunun theih dan leh a rilru put hmangte khan engkim a hril chiang vekin ka ring. Bruno chu a ṭha ngaiin a la ṭha reng a ni," a ti bawk.
Kar lai khan Roma an hneh ṭumin Fernandes hi man of the match atan thlan a ni a, kar tawpa Villa an hmachhawn hunah hian tun season-a a vawi khat nan United chu a zawnin match hnih hnehna chanpui a tum dawn a ni.
Carrick chuan mahni muala match hmachhawn leh tur chu a nghahhlelh thu sawiin, "Engpawh thleng dawn se, inkhelh chungchangah chuan thil thleng tur chu a thleng dawn a, ṭha taka kan inbuatsaih a ngai a ni; he inkhel hi ka nghakhlel hle bawk. Zan hmasa inkhel pawh kha rilru takzetin ka lo nghakhlel a ni tih ka sawi tawh kha. Mahni mualah kan khel leh dawn a, fan-te pawhin phur tak leh beiseina sang tak nena min rawn thlir ka beisei a, chu chu khelmualah kan rulhlet ngei a ngai a ni," tiin a sawi zui a ni.
