Manchester United chuan Fulham lakah hun tawp dawn hnaihah goal an khung hlauh avangin zahna pumpelhin 1-1 in an inhnehtawk hram a. Mahse, inkhelh tluanin an che ṭha lo hle a, tun season chhunga an dinhmun beidawnthlak tak chu Craven Cottage-ah hian a rawn lang nawn leh a ni. United player-te chu khelmualah an zawi hle a, an khingpui Fulham aiin an tlan tlem zawk fê a, hei hi tun season-a an buaina lian ber zinga mi a ni chhunzawm zel.

Inkhelh zawhah United manager Michael Carrick chuan a player-te chu thiam chantir tumin, vanneihna an neih loh vang chauh a nih thu leh an tha (energy) a tlem loh thu a sawi a. Mahse, United captain hlui leh Sky Sports pundit Gary Neville erawh chuan ngaihdan dang hlak a nei thung. Craven Cottage-a a thil hmuh hnuah a teammate hlui Carrick chu a player-te sawisel ngam tur leh thlavang hauh bansan turin a chhal ta a ni.

Neville chuan, "Man Utd team ball an chan loh laia hetiang em ema ke a kal kual hnem hi ka la hmu ngai lo. Michael-a'n team tha (energy) ah buaina a awm loh thu a sawi zo chiah a. Michael hian a player-te thlavang hauh hi a bansan a ngai a ni. Engvangin nge a chhan ka hrethiam tho mai; a rinawm a, a player-ten a tana theihtawp an chhuah a duh a, season kal mekah kawng thui tak la zawh tur a awm bawk a ni," tiin a sawi.

A sawiselna chhunzawmin Neville chuan, "Team hnih te kha an inang reng a, 'milim' (mannequins) tiin ka ko hial. United team hetiang em ema muala kual vel mai mai hi ka la hmu ngai lo. Harhvangna pakhatmah a awm lo a, phurna a awm hek lo. Khelmualah chuan engtik lai pawhin inring renga awm tur a ni asin," a ti. Ball an chan loh laia United player-te an kal kual mai mai avangin Fulham lamin buaina miah lovin ball an chang tam thei hle tih a sawi bawk.

England international hlui chuan, international break a lo thleng ta chu United tan hun fuh lutuk a nih thu a sawi a, he an harsatna lian tak hi an ngaihtuah ho a, chinfel an tum a ngai a ni. Neville chuan sawi zelin, "Team pakhatin an thawkrim lo emaw, ṭan an la tawk lo tia sawi hi ka ti zen zen ngai lo. Hei hi chu player-te laka sawiselna na ber a tling a, sawi pawh ka sawi fimkhur hle ṭhin. Mahse second half minute 15 hmasa chhung leh minute 60 chhung zawng deuhthaw khan, Man Utd kha chu thil zahthlak tak a ni. Ball an neih loh laia an khelh dan kha beisei a phak lo takzet a ni," tiin a sawi.

Carrick hian mipuite hmaa a sawi ang ni lovin, a ruka an inbiak hunah chuan a player-te hnenah thu dang hlak a hrilh ngei a rin thu Neville chuan a sawi a, mahse thil a danglam thuai lo a nih chuan manager pawh hi buaina lian takah a la inbarh lut thei dawn tih a vawm lang bawk. Carrick-a squad-a player awmte chuan defensive lamah manager an pui tawk lo hle tih sawiin, Bryan Mbeumo leh Marcus Rashford te chu hma lamah leh sirah an awm sang lutuk a, Youri Tielemans leh Kobbie Mainoo te chu an chet phung a muang lutuk niin a sawi.

Chu mai bakah, Matheus Cunha leh Bruno Fernandes te chu mual laiah an vak kual thlawn hnem lutuk a, defensive structure lamah insiamṭhatna lian tak an neih a ngai tih a tarlang a, a chhan chu khelmuala ke a kal vel mai mai player an tam lutuk a ni tiin a tlip zui bawk.