Fulham nena Premier League inkhelah Manchester United chuan beisei an phak loh zia pholang lehin 1-1 in an inhnehtawk a, an khelh dan enin head coach Michael Carrick-a naute tan thil ngaihtuahawm lian tak a tling chho ta a ni. First-half tawp lamah goalkeeper Senne Lammens chuan thawk a la kawk hial a, chawlhlawk hmain vawi li ngawt save ropui a nei hman a ni. United tlarhnung zawr lutuk avangin Fulham-in hun ṭha tam tak an insiam a, Belgium international goalkeeper chet ṭhat vang chauhvin chawlhlawk thlengin goal an chhuah lo hram a ni.
A bikin Josh King-a shot a dansak kha a ropui zual a. King hian Luke Shaw chu awlsam takin a bum a, goal kil veilam hnuai lama a pet lut tur chu Lammens hian David de Gea ang maiin a ke hmangin a lo dang per a ni. Season ṭan tir lamah ṭantute ṭhenkhatin Lammens-a theihna chu beisei a phak lo niin sawi mah se, Fulham laka United a chhanhim zui dan aṭang hian chutiang sawiselna chu thil atthlak a nih zia a chiang hle. Craven Cottage-a a inlan hmasak ber a ni a; season liam taa United-in he khualmual an tlawh ṭum kha chuan ani hi Royal Antwerp player a la ni a, Altay Bayindir bul ṭanin Andre Onana chu bench-ah a ṭhu thung a nih kha.
Fulham hi he match hma hian tun season-ah goal li chauh khungin Premier League mawngphahah an ṭhu mek a, chuti chung chuan United tlarhnung chu an pawt darh hneh hle. Carrick chuan inkhelh hmain tlarhnung venhim lam siamṭhat a ngaih thu sawi mah se, mual chhungah erawh tlarhnung a inhawng huau thung a ni. Press box kianga Fulham fan ṭhu pakhat pawhin chawlhlawk laiin, "Kumin season chhunga chance kan siam hnem ber ṭum a ni," a ti hial a. Season ṭan tirh aṭanga an chet chhiat avangin United player-te inrintawkna a tlahniam hle a, through ball a pek thelh hnuah Bryan Mbeumo-a'n Diogo Dalot chu hawi sang tur leh beidawng lo tura a hrilh lai pawh hmuh a ni.
Brighton an hmachhawn hnuah a ngilruh hliam a chhuah leh tak avangin striker Benjamin Sesko a inlan thei lova, Carrick-a'n striker pangngai awm lovin Matheus Cunha chu hma tawpah a chhawr a ngai ta a ni. Sesko-a hliam neih ngun lutuk hian ngaihṭhatlohna a siam lian hle a; season liam ta khan khup hliam vangin thla khat chuang a chawl a, season tawp lamah a ngilruh hliam vang bawkin match thum a khel thei lo bawk. Cunha hian striker lailia khelh chu a inhmeh lo hle a, second half-ah Kobbie Mainoo-a ball chhuah tum chu Calvin Bassey-a'n tharum hmangin a chhuhsak a; Bassey-a shot chu Lammens-a'n dang hman mah se Lisandro Martinez-a per zawngin goal-ah a lut ta a ni.
Sky Sports-a commentary nei club captain hlui Gary Neville chuan United khelh dan chu tenawm ti khawpin a sawisel a, "Kum 5 mi ka nih aṭangin Manchester United hi ka en tawh a, tuna minute 15 an khelh dan hi ka la hmuh chhiat ber a ni. A tenawm zawk a ni," tiin a thinrim thu a sawi chhuak hial a ni.
Cunha chuan hun tawp dawn lamah goal per hmangin siphurh sut mah se, Carrick-a tan chuan mual chhung hmun tinah buaina a tam hle a ni. Season liam taa Premier League-a pathumna ni thei team chu tunah chuan hriat hran theih rual lohvin an zawi a, midfield-ah tha an nei lova, tlarhma lamah ruahmanna mumal a awm lo. Team tana che ṭha ber goalkeeper a nih tawh chuan club tana hriattirna hlauhawm lian tak a tling a, international break hmachhawn tur Carrick-a tan pressure a sang zual ta hle a ni.
