Manchester United chuan tun season thar chu harsatna hrang hrang karah an ṭan a, Michael Carrick-a naute hian chona lian tak tak an hmachhawn mek a ni.

Khelmuala an result leh an khelh dan a la nghet tawk lo va, khelmual pawn lama thil thleng hrang hrangte nen Old Trafford boruak chu a rit chho hle. Carrick hian hliam nei an pun chhoh zel avangin harsatna a tawk bawk a, nipui bazara Brighton aṭanga an lak thar Carlos Baleba pawh United tana a vawi khat nan inlan turin chawlhkar eng emaw zat a la nghah a ngai dawn a ni.

Chutih rualin VAR thutlukna avangin beidawnna an tawk nawn leh a, academy rawlthar langsar JJ Gabriel-a chungchang pawhin ngaihven a hlawh hle; he kum 15 mi hi first-team player la ni thei tura club-in an ngaih laiin United chhuahsan a nawr nia tarlan a ni. Tun international break hi United tan chuan inngaihtuah thar leh inbuatsaih ṭhatna hun remchang tak a ni ang.

Manchester derby-ah khan Manchester City chakna goal pawm a nih chungchangah Pro Ref (PGMOL hlui) aṭanga ngaihdam dilna an dawn chu Michael Carrick chuan thil lian thamah a ngai lem lo.

Pro Ref hotu Howard Webb chuan referee-te tihsual a awm ngei tih a pawm a, City teammate Enzo Fernandez chu offside position-ah a awm chungin Erling Haaland-a goal khung chu pawmsak a ni. A tirah referee-in he goal hi a lo pawm lo phawt a, mahse VAR review hnuah referee thutlukna chu sutin goal hi pawm a ni ta zawk a nih kha. He thil thleng hian sawisel a hlawh hle a, Fernandez-a awmhmun chu VAR-in a ngaihtuah tel loh chhan an zawt nasa hle. Match zawh hnu lawkah United hnenah hian ngaihdam dilna hi thehluh zui a ni.

Carrick chuan VAR hman chhunzawm zel chu a thlawp reng tho va, mahse ngaihdam dilna chuan an rilru natna a tiziaawm phah lem lo tih a sawi: "Khatiang thil thleng palh mai kha chu a awm thei a ni. VAR system-ah hian rinna ka nei reng tho va... mahse ngaihdam dilna hian awmzia a nei thui lutuk lo. 'Kan tisual a ni' tia kut phar chhuaha an rawn pawm chu ka lawm a, ka zah thlap e. Thil thleng a ni a, hmalam pan zel turin kan hmaa lo awm apiang chu kan hmachhawn zel a ngai a ni," tiin a sawi.

United striker hlui Louis Saha chuan midfield-a Casemiro-a hmunruak luah turin Carlos Baleba hi United tan a pawimawh hle dawn niin a ring.

Cameroon international hi kumin nipui khan Brighton aṭangin £70m-in United hian an la a, Carrick-a hnuaiah No. 6 role luah tur bera ngaih a ni. Casemiro-a'n Old Trafford a chhuahsan takah chuan tlarhnung veng a, hma lama ball nawr chho thei midfielder thar United hian an mamawh hle a ni.

Saha chuan Baleba hian chutiang mawhphurhna la tur chuan taksa chakna leh thiamna a nei tawk tih a sawi a, mahse an tlarhma theihna phawrhchhuak tur chuan United hian Baleba hi a theihna sang ber an hman ṭangkai a ngai dawn tih a tarlang.

Saha chuan, "Carlos Baleba hi team-a bul ṭan thei tura a fit ṭhat hunah chauh United season hi a inṭan tak tak ang. Kobbie Mainoo emaw Youri Tielemans te aia chakna rawn thlen theitu a ni a, anni pawh player ṭha tak an ni; mahse Baleba hian tha a ngah zawk a, he team hi sang zawka a hlangkai thei a ni. Ball a khawih laia a nawr nat theih dan hi ka duh a, dribble hmangin khingpuite tlarhnung a pawt darh thei a ni. Chutiang ti thei lo tura dan beh chu tihsual lian tak a ni ang.

"Casemiro ang a ni thei a, ani kha chu dribbler a ni lo na a, team a nawr sang thei a, striker emaw winger-te hnenah tlang takin ball sang a pe nghal thei ṭhin. Ball a chhuhsak a, a pass hmasaber chu hma lamah a ni ziah. A chang chuan a tisualin ball a hloh ṭhin a, mahse team tana a ṭangkaina kha a lian zawk a ni. Tlarhnung vengtute hna chu midfielder-te hnenah hetianga hlauhawm thlen ngam tur hian inrintawkna pek a ni. Chutiang an tih ngam loh chuan pawi tak a ni ang, tun dinhmunah United hian goal khung thiam tak tak tlarhma an nei a, mahse zalen taka chet theihna pek an ni lo. Carlos Baleba hian chu zalenna chu a pe thei a, Mainoo leh Tielemans te aiin kawng a hawng thei dawn a ni," tiin a sawi.