Manchester United academy chhuak theihna ngah tak JJ Gabriel chuan Old Trafford chhuahsan a duh thu a thlen a, club aṭanga de-register a nih a ngen ta. He rawlthar kum 15 mi hian Premier League-a a cham zui zel a nih chuan Chelsea zawm chu a duh ber nia tarlan a ni.
Gabriel hi United academy-in an chhuahchhuah theihna nei ṭha berte zinga mi a ni a, free agent anga club thar a pan theih nan United hnenah hian de-register a nih a ngen a ni. Tun hnai khan Barcelona khawpuiah thlawkin, Catalan club hian an ruahmanna an lo chhawpchhuak tawh a. Hemi bakah hian Real Madrid pawhin he rawlthar hi an lo ngaihven ve hle bawk.
Team Talk-in a tarlan danin, Gabriel dawrtu English club hrang hrang zingah Chelsea rawtna chu a duh zawng ber a ni. Gabriel hian United nen scholarship inremna a la ziak lo a. Dan ang chuan player naupangte hian kum 16 an tlin hma chu scholarship contract an ziak thei lo a, ani hi October ni 6 hian kum 16 a tling chiah dawn a ni.
Mahse, March thla khan Chelsea hi thla kua chhung academy player lakluh khapsak an nih avangin, Gabriel hi lalut dawn ta pawh nise January transfer thleng an nghah a ngai ang.
England chhung club danga a insawn a nih chuan United hian zangnadawmna sum tam tham tak an dawn a beiseiawm a. Rio Ngumoha-a'n Anfield a pan khan Liverpool aṭangin Chelsea-in £2.8m zangnadawmna an dawng a, chutiang a nih chuan United pawh hian pound maktaduai tam tak an hlawh theih a rinawm.
Spain lam club a zawm a nih thung chuan, European Union dan ang leh EU passport nei kum 16 mi transfer dan angin, player-in club-a hun a hman tawh zat chhut chhuahna (tariff) hmangin United hian zangnadawmna tlem zawk an dawng dawn a ni. Hei hi hmanlai aṭanga lo thleng ṭhin a ni a, Cesc Fabregas-a'n rawlthar a nih laia Arsenal a zawm leh Gerard Pique-a'n United a pan ṭum ang kha a ni.
Gabriel-a chungchang zawhna chhangin United head coach Michael Carrick chuan fimkhur a ngaih thu a sawi a, ani chu la naupang tak a nih thu khelmual mi te a hriattir a ni. Carrick chuan, "Nimin lama ka sawi tawh kha ka sawi nawn leh mai ang. JJ hi tlangval naupang tak a la ni a, he thilah hian thu lian tham engmah kan chhuah loh a pawimawh hle. Mipui ngaihvenna leh sawi zui hlawh lutuk lakah hian kan fimkhur a ngai a, a dinhmun kan ngaihtuah tel a ngai a ni. He thil hi engti zawng pawhin a fel chho ve mai ang. Amah a ṭha tawk em tih hriat chian hi thil pawimawh ber a ni," tiin a sawi.
He transfer buaina kal mek karah hian, tun kar hian international break atana England youth squad thlannaah Gabriel hi koh a ni ta lo a, under-19 leh under-17 squad aṭangin hnawl a ni ve ve a ni.
