Tun season chhung Hibernian lama loan-a khel mek Manchester United rawlthar Jacob Devaney chuan senior football huangah hmasawn zel a tum a. Youth international huangah Ireland tan chhinchhiah tlak thil thar a nei chho zel bawk a, tun hnaia England Under-21 laka an hnehna chan ropui tak chu a theihna pholanna lian tak a ni.

Ireland U21 hian England U21 chu 3-1 in an hneh a, he match-ah hian Devaney hi minute 90 chhung a khel tluan bakah khelmuala che ṭha leh langsar berte zinga mi a ni. England U21 hian U21 Euros khel turin tling tawh mah se, Premier League-a inlan pha player tam tak chhawrin squad chak tak an rawn rem a, Ireland tan chuan chona lian tak a ni.

Ireland U21 tan hian Devaney hi defensive midfield-ah a bul a ṭan a, a chet ṭhat em avangin nakina Manchester United senior team-a inlan ve theih a beiseina chu a tipung sawt bawk. Mual lailiah a tlan kual ngun hle a, hmun awl hnawhkhatin elpuite ball chhuhsak tumin a inpe bawk a, England lamin ball chang tam zawk mah se inkhelh thunun zui zel kawngah thawhhlawk tak a ni.

Inkhelh chhung hian Devaney hian inbeihna (duels) vawi ruk a chak a, defensive contribution vawi kua neiin, ball touch 35 leh key pass vawi khat a nei a, midfield-ah a thawh hlawk hle a ni. Manchester United tana chanchin lawmawm ber chu, international break hmaa Fulham tana United player-te lo tibuai em emtu Josh King laka a chungnun zawk tlat kha a ni.

Ethan Nwaneri leh King-a ten ball an chan apiangin Devaney hian a zui chawt a, an hnungah a awm chilh reng avangin England hian final third lamah ball an nawr lut thei meuh lo a ni. Inkhelh tawp lamah boruak a san tak avangin ball hloh zeuh nei mah se, rang takin chhuhsak lehnghal tumin a bei a, a rilru puitling zia leh inpekna sang tak a neih zia a pholang chiang hle.

United hotute tihlawmtu ber tur chu tha hmanga inbeihna (physical duel)-ah he tlangval hi a duai lo em em kha a ni. Ball a khawih laia a thluak ṭhat zia leh phili lo chu hriatsa ni mah se, senior football-ah taksa tharum lam pawhin hma a sawn hle tih a lang chiang a. Hetianga a puitlin chhoh zel chuan Old Trafford-a senior team tana debut siam theihna hun remchang a inhawng thuai dawn a ni.

Devaney hi October 10 hian Dundee United mualah Scottish Premiership match khel turin Hibernian tan a inlan leh beisei a ni.