Manchester United goalkeeper Senne Lammens chuan Tottenham nena an inhnehtawk ṭuma bench aṭanga rawn lut Carlos Baleba chuan team tan "phurna thar" (extra spark) a rawn thlen niin a sawi.

Old Trafford-a Spurs nena 0-0 a an la intluk mek laiin, minute 60-naah manager Michael Carrick chuan vawi khatah player pathum a thlak a; Youri Tielemans, Leny Yoro leh Amad te lachhuakin Baleba, Diogo Dalot leh Joshua Zirkzee te a luhtir a ni.

Kumin nipuia Brighton aṭanga lakluh, kerek hliam avanga a luh tirha inlan nghal thei lo Baleba hian mual a rah rualin Old Trafford mipui lamin ding meuhvin lawmthu chibai an lo buk (standing ovation) a ni. Carrick-a thlakna siam hnu lawk hian United chuan hma an hruai zui ta nghe nghe a, mahse hun tawp injury time-ah Lisandro Martinez khumin Dominic Solanke chuan goal-ah a lo tauh lut a, Tottenham-in an siphurh an sut ta hlauh a ni.

United tana zan beidawngthlak tak ni mah se, Baleba-a debut siam chu thil lawmawm langsar tak a ni a. Hemi chungchang hi sawiin Lammens chuan, "A pawimawh takzet a ni. Vawiin thil ṭha zinga langsar ber chu anni rawn lutin min puih nasat zia hi a ni a, mipui zawng zawng pawhin an hmu vek ang," a ti.

Lammens chuan sawi zawmin, "Hun tawp lamah khan phurna thar leh tha thar kan mamawh a ni. An theihna an rawn lantir thei hi anmahni tan pawh ka lawmpui takzet a, mahse hei hi nitina training-a kan lo hmuh ṭhin sa a nih avangin kan tan chuan thil thar a ni chuang lo. Squad chhah tak kan nei tih kan hria a, chuvangin tun season-ah an rawn penchhuah a ngai dawn a, vawiina an ti thei hi ka lawm hle a ni," tiin a sawi.

Half-time-a Carrick-a thurawn leh tactics thlak pawhin an khelh dan a tihṭhat thu Lammens chuan sawiin, "First half-ah kha chuan ball kan neih lai leh neih loh laiah kan ṭhat zawk a ngai tih a chiang reng mai. Min nawr dan tur tactics ruahmanna fel tak an nei a, tal chhuah a harsa hle a nih kha. Mahse half-time-ah khan tactics lamah inthlakthlengna kan nei a, player rawn lut te khan nasa takin min pui zui bawk a ni," a ti.

"Khatiang a nih takah khan inkhel kan thunun chho ta a, mahni kutah inkhel kan la niin a inhriat theih. Chuvang chuan match lehpekah chuan a tir aṭanga khatianga ṭan kha kan tum a ngai a, a bikin he mual chhungah ngei hian khingpuite nawr a, inkhel thunun nghal zung zung kan thiam a pawimawh," a ti zui bawk.

Khualmuala match harsa tak tak an hmachhawn chhoh zel turah he Belgian goalkeeper hian rilru paukhauh put tlat a duh a. "Hetiang hian thlir dan kawng hnih a awm a; match a inlar zut zut dawn tih kan hria. Beidawnna kan tawn hian i chhawm zui reng thei a, a nih loh leh rang takin i inthing harh thei bawk. Ka mimal ngaihdanah phei chuan, khel ṭha tawk lo mah ila rilru na reng lova match lehpek ngaihtuah nghal vat hi ka duh dan a ni," tiin a sawi.

"Vawiinah thil ṭha tam tak kan pholang a, chungte chu chhawm nun a, kan tihsual aṭanga inzir zawk tur a ni. Match pawimawh tak tak khelh tur a awm nual a, mahse hetiang inkhelh hi kan chak zawng a ni hrim hrim. Season liam ta khan Champions League khelh theih nan kan bei nasa hle a, hetah kan awm leh thei hi kan lawm a, inelnaah hian thui tak thlen kan duh a nih chuan heng match-te hi kan chak a ngai a ni," tiin Senne Lammens chuan a tlip ta a ni.