Pundit Jay Bothroyd chuan Manchester United rawlthar kum 15 mi JJ Gabriel chu a taksa lenzawng leh dinhmun thlirin Spain rama La Liga pan chu a tana ṭha ber tur a nih theih thu a sawi. English football top flight-ah tharum hman a nasat em avangin Premier League-ah chuan Wayne Rooney leh Arsenal rawlthar Max Dowman te ang lo takin Gabriel hian harsatna a tawk thei niin a tarlang bawk.
He tlarhma forward kum 15 mi hi Manchester United chhuahsan a duh nia thuthang a awm hnuah Greater Manchester huamchhungah sawi a hlawh chho hle a. A hun ṭhanglian mek zel tur atana theihna sang ber thlen a duh avangin Old Trafford chhuahsan hi a rilruk niin hriat a ni. Super agent Ali Barat chuan he rawlthar chhungte leh Real Madrid bakah Bayern Munich te inkarah inbiakna a lo kawhhmuh tawh bawk a, Barcelona pawhin he forward hi an ngaihven ve bawk nia tarlan a ni.
Kar liam ta EFL Cup-a Brighton & Hove Albion an hmachhawn ṭum khan Manchester United first-team tana a vawikhatna atana inlan theihna hunṭha he academy player hian a nei hman a, head coach Michael Carrick chuan he match-ah hian telh a lo tum rilruk tawh bawk a ni. Chutiang chu ni ta se, Gabriel hi United chanchina first-team match khel thei naupang ber a ni ngei ang. Mahse, kar tir lama chhuah a dilna (transfer request) thehluh a nih tak avangin he hunṭha hi a puitling ta lo a ni.
Thil thleng zelah Gabriel hian a Instagram profile-a a thlalak dah zawng zawng a delete fai vek bawk a, a chhan engmah erawh a sawifiah lo thung. United fan-te chuan khawvel football-a wonderkid langsar ber ni chho thei tur he rawlthar hi chelhtlat an duh em em laiin, Bothroyd erawh chuan Spain rama insawn chu a theihna tipung tura kawng remchang ber a nih a rin thu a tarlang.
Piers Morgan-a Sports Uncensored show-a Simon Jordan leh Andros Townsend te nena an titi dunnaah, Coventry City, Wolverhampton Wanderers leh Queens Park Rangers striker hlui Bothroyd chuan Gabriel-a chhungte thutlukna chu a hriatthiampui thu a sawi.
Bothroyd chuan, "A tawpah chuan, nu leh pate hian an fapa tana ṭha ber tur an duh mai a ni. 'Tunah la la hian a khelh nghal kan duh' an ti pawh a ni chiah lo, 'A kal theihna kawng ṭha ber tur zawh se kan duh' an tihna a nih hmel zawk mah a ni," tiin a sawi.
A taksa pianhmang chungchang sawi zawmin Bothroyd chuan, "A taksa en ta che u. Florian Wirtz chungchang pawh sawiin, 'A taksa a te lutuk, Premier League-ah a la khel thei lo, a khel tling lo ang,' kan ti ṭhin a nih kha. JJ Gabriel-a taksa pawh hi a danglam chuang lo. Chuvangin Barcelona emaw, Spain lam emaw, khawi hmun pawh nise a tana ṭha zawk tur a ni ang tih an ngaihtuah pawh a ni thei. A nihna takah chuan a chungchang hi a chhe zawnga kan sawi ringawt tur a ni lova, a nu leh pate pawh kan dem ngawt thei lo ang," a ti.
Gabriel-a nu leh pate leh agent-te nge coach-ten thurawn pe ṭha thei zawk ang tih zawhna Simon Jordan-a'n a zawh chuan, Bothroyd chuan nu leh pate an nih thu chhangin: "Nu leh pate ka ti zawk ang, an fa hi an hrechiang ber miau a. Tun dinhmuna a theih chin tur pawh an hre ber. Puitling taksa pawh a la pu pha lo hrim hrim. Max Dowman chungchang kan sawi a... Max Dowman ka en hian Rooney nen an inanna ka hmu ṭhin. Rooney phei chu kum 16 a nih lai khan defender-te leiah a theh tlu tawp tawp thei a, chu chu Dowman-a tih pawh ka hmu bawk. Mahse JJ Gabriel erawh a danglam a, a taksa a la tein a cher zawk a ni.
"Ani chu Neymar ang taksa pu chi a ni a, a tlan chak em em a ni. A kete a rang hle a, a che rangin a tlan thut thei bawk. Mahse tharum hmang erawh chuan tu defender mah leiah a paih tlu ve dawn lo. A chhungte pawhin hei hi thlirin, 'La Liga ang chi ram pawn league-ahte hian a hmasawnna kawng hi a ṭha zawk maithei a ni' an ti pawh a ni mahna," tiin a sawi chhuak a ni.
