Inrinni hian Premier League match-ah Manchester United chuan Old Trafford-ah Tottenham an mikhual dawn a, he match pawimawh tak hma hian head coach Michael Carrick chuan an squad hliam dinhmun tarlangin, player pathum Patrick Dorgu, Noussair Mazraoui leh Benjamin Sesko te chu an inlan thei dawn lo tih a nemnghet ta.

Heng player pathumte bakah hian Kobbie Mainoo leh Marcus Rashford te pawh training an zawm ve deuh chauh avangin inkhelh theih dinhmuna an awm leh awm loh chu enfiah leh phawt a ngai dawn a, Amad pawh a inhliam dam chhoh mek avangin a inlan theih a la rinawm chiah loh bawk. Striker Sesko hian a ngawn hliam neih sa a rawn chhuah leh avangin ram tana a fehchhuahna aṭangin a inhnukdawk a, Mainoo leh Rashford te pawh England squad-in Nations League match pali an khelh tur aṭangin an lo inhnukdawk tawh bawk a ni.

International break chhung khan United tan buaina a zual chho hle a, Dorgu leh Mazraoui te chuan Denmark leh Morocco aiawha an khelhnaah hliam an tuar ve ve a ni. Chanchinbumite hmaa a inlan ṭumin Carrick chuan, "Helai hmuna kan ṭhut dun lohna a rei ta hle mai. International break chhung khan chanchin lawmawm leh lungchhiatthlak a inpawlh nuai a ni," tiin a sawi.

Carrick chuan an player hliamte sawifiah chhunzawmin, "Patrick kha lakchhuah a ngai a, kar eng emaw zat chu a chawlh a ngaih hmel hle. Nous pawh lakchhuah a ni a, a inhliam ve bawk. A la ṭha famkim chiah lo a, a dinhmun kan la thlithlai zel a ngai ang. Carlos [Baleba] erawh a ṭha chho hle a, training pawh a bei nasa. Amad-a'n tlem a ti a, Marcus leh Kobbie te pawhin training tlem chu an nei ve tawh a, squad chhung dinhmun chu a inang tlang chiah lo a ni. Ben [Sesko] erawh a hliam neih avangin a la kir thei mai dawn lo a, inkhel turin a inpeih lo ang," a ti.

Inrinni inkhelh hma hian Tottenham chu league table mawngphahah an ṭhu mek a, mahse United boss Carrick chuan a club hlui hi dinhmun hniamah awm mah se a ngainep miah lo thung.

Carrick chuan, "Table dinhmun aia ṭha zawk hian match ṭhenkhatah chuan an khel ṭhin a ni. An inkhelh tawh dante kan thlir chuan team ṭha tak, player ṭha tak tak nei an ni tih a lang reng mai. Kumin nipui chhung khan squad thar an din a, a hmaa an neih ṭhin nen chuan a inang lo deuh maithei, mahse team ṭha tak an ni tho. Point hmuh tlem vang maiin min zawt a nih pawhin ka hrethiam e, mahse an theihna sang ber kan hmachhawn dawn nia inngaiin he match hi kan khel dawn a ni. Inkhel tam zawkah an theihna tak tak an phochhuak tawh a, mahse an khelh ṭhat phu erawh chuan result an hmu lo mai zawk a ni," tiin a sawi chhuak bawk a ni.