International break a zawh a, club football a rawn inṭan leh huna Real Madrid leh Villarreal inkhelh hmain, Real Madrid manager hlui Jose Mourinho chuan chanchinbumi te a hmachhawn dawn a. Manchester United ṭantute chuan he hun hi an nghakhlel hle a, a chhan chu Manchester City-in financial rule an bawhchhiatna chungchangah Mourinho hi zawhna zawh a nih ngei rin a nih vang a ni.

Kum 2017-18 season khan Mourinho-a hruaina hnuaiah Manchester United chuan Premier League-ah pahnihna dinhmun an luah a, he season-ah hian Manchester City chu champion an ni a. Mahse tun hnaia City-in financial fair play dan an bawhchhiat chungchanga thutlukna hrang hrang leh puhna rawn chhuak avangin, Mourinho hian he nomawi hi heu let leh a, United hnena hlan a nih theihna hunṭha a awm tih a lo sawi tawh ṭhin a ni.

Kum hnih liam ta khan Fenerbahce-a a awm laiin, Europa League match-a United an hmachhawn hmain Mourinho chuan, "Nangni pawhin in hria a, kum 2017 khan Europa League-ah kan champion a, 2018 khan Premier League-ah pahnihna kan ni bawk. Kha league title kha kan la hauh theih beiseina ka la nei a ni, a chhan chu City hi point minit an pe a nih chuan, title hi kan ta a ni ang a, mi bonus tur leh medal pawh min pek a ngai dawn a ni," tiin a lo sawi tawh a ni.

Hemi hnu hla vak loah Pep Guardiola nena an in-chhaih zui hle a. Guardiola-a'n Premier League title vawi thum a lak leh vawi ruk a lak tawh chungchang a sawi hnuah, Portuguese manager Mourinho chuan chhang letin, "Ani'n nomawi vawi ruk a la a, keiin vawi thum ka la thung, mahse kei chuan thianghlim tak leh dik takin ka la a ni. Tlawm pawh ni ila ka tumpui chu ka lawmpui mai ṭhin, insamhnawh tuma court-a thubuai 150 zet hmachhawn chung hian hnehna chan ka duh ve lo," tiin City leh Guardiola te chu a lo ṭawngkhum tawh bawk.

Rio Ferdinand-a podcast-ah pawh Mourinho hian he thil hi a lo sawi chhuak tawh a, "Kha season-a title kha kan lak theihna hun a la awm a ni lawm ni? City hian financial fair play dan an bawhchhia tih finfiah a nih a, point paihsak an nih chuan kan champion a ni mai," tiin hlim takin a lo sawi tawh bawk.

Mourinho bakah hian 2017-18 season-a United tana inlan pawimawh tak tak David de Gea leh Juan Mata te pawhin he thil hi tun hnai khan social media leh chanchinbu-ah an lo sawi chhuak ve tawh a ni. City chungchanga chanchin thar a chhuah hnu hian, Mourinho-a'n press conference-ah eng thil nge a sawi zui dawn tih chu khawvel football ngaihsak tuten an thlir ṭhap mek a ni.