Sir Jim Ratcliffe-a'n kum hnih liam taa Ineos office-a Manchester United chanchinbumite a inkhawmpui ṭum khan, Manchester City inrelbawl dan leh an hlawhtlinna chu a lo fak hle a. "Manchester City hi i thlir chuan, relbawl dan fiah leh kalphung fel tak an nei tih i hmu ang. A chhunga thawktute pawh an ṭha em em a ni," tiin an elpui lian chu entawn tlak a nih thu a lo sawi tawh a ni.

Ratcliffe hian British billionaire a nihna angin City chu inrelbawl dan ṭha bera ngaiin, Old Trafford project thar enkawl chho tur hian an staff hlui engemaw zat chu an lalut ta ruih a. Chung zinga langsar ber chu chief executive officer (CEO) atana an lakluh Omar Berrada a ni a, a luh tirh khan United chuan title lak lehna tur kawnga "kalchhen hmasaber" a nih thu an lo puang hial a ni. Berrada hian City Football Group-a chief football operations officer a nihna chhuahsanin United hi a zawm a ni.

Hemi hnu hian Southampton aṭangin academy director lo ni tawh Jason Wilcox chu an lalut leh a, Wilcox hi a hmain kum 11 chhung City academy director-in a lo thawk tawh a ni. Thawktu dang an lakluhte zingah communications director Toby Craig, performance director Sam Erith, academy director Stephen Torpey leh Under-21 assistant coach Alan Wright-te an tel bawk a, anni ho hi an hmaa City-a lo thawk tawh thin vek an ni.

Mahse, tun hnai kar liam ta khan Manchester City hlawhtlinna lo neih tawhte chu thil dik tluantling a lo ni lo tih a rawn lang ta a. Premier League independent commission chuan City hi kum 2009/10 leh 2017/18 inkara financial rule bawhchhiaah a puh thiam a, kum 9 chhungin sponsorship income a taka an hmuh aia tam £830m chuang ziah luh anga lantirin, accounts dik lo siamah an thiam loh a chantir ta a ni. Hei hian football khawvel a ti-phu nasa hle a, City hian hremna lian tak an hmachhawn dawn nia ngaih a ni.

He thil thleng avang hian United fan-te pawhin City staff hlui Old Trafford-a lakluh tam lutuk chu an ngaihtuah zui deuh a. Mahse, club thudawnna chuan tarlan danin, United CEO Omar Berrada leh thawktu dang pangate hi City rule bawhchhiatnaah hian inrawlhna pakhatmah an nei lo. Berrada hi City-a a awm laiin finance role hrang hrang lo chelh tawh mah se, he thubuai ngaihtuahnaah hian thuhretu atan pawh koh a ni lo a, eng thiamlohna mah a chungah thlen a ni lo bawk.

United thawktu hrang hrangte hi City-a an lo thawh tawhna avanga an CV a ṭha zual em em mai bakah, mawhphurhna chelh tlak an nih ngei avanga lakluh an ni a. City boruak buai tak avang hian Old Trafford-ah nghawng ṭha lo leh hnuhma (breadcrumbs) engmah a awm dawn lo tih United hotute chuan an chiang hle a ni.