International break chhunga an match hnihnaah Argentina chuan 7-0 ngawtin Burkina Faso an sawp a, he match-ah hian Manchester United defender Lisandro Martinez chu khelmualah inlan lehin first-half chhung a khel a ni.

An match hmasa zawk Bolivia an hmachhawn ṭum pawh khan Martinez hi a che ṭha hle a, tuna Burkina Faso lakah phei chuan harsatna tawk miah lovin a inlan zui leh ta a ni. United-in an match lehpekah Tottenham Hotspur an hmachhawn dawn avangin, Argentina media hrang hrangte chuan he defender-a chet dan hi an thlir uluk hle.

Khelmual pawn lam boruak ṭhenkhat avangin African side Burkina Faso hian squad chak tawk lo zawk an rawn rem a ngai a, hei hian Martinez-a tan khelmuala mawhphurhna a tizangkhai zual hle a ni. Inkhelh ṭan hma hauh aṭangin chak tur a hriat sa deuh vek tawh avangin, Man Utd ṭantute ngaihtuah ber chu Martinez-a'n hliam a tuar loh a ni ber a.

He defender hi first-half chhung ṭha takin a inlan a, tihsual nei miah lovin half-time-ah lakchhuah a ni a, hliam tawk lovin a chhuak thei a ni. Minute 45 chhung lekin pass vawi 70 a neih zinga 68 chu a ṭhiante hnenah a thleng dik (completed) a, vawi 72 ngawt ball khawihin vawi 5 lai chu ball a chhuhsak (recoveries) bawk a ni. Tlar hnungah buaina lian tham a tawk meuh lo a, Spurs an hmachhawn hmaa Martinez tan chuan warm-up match ṭha tak a tling a ni.

Argentina media-te pawhin Martinez-a chet dan chu fak zuiin, buaina nei miah lova pass ṭha a neih theih dan leh tihsual nei miah lova minute 45 a khel thei chu Carrick-a tan lawmawm tak a nih thu an tarlang hlawm a ni.

TYC Sports chuan rating 6/10 pein "harsatna engmah a tawk lo" tiin an tarlang a; La Pagina Millonaria pawhin 6/10 pe vein, "Tlar hnung aṭanga ball chhuahpui kawngah a che fel fai hle a, a thawhpui ang chiahin ball a pe dik em em a ni," tiin an ziak.

El Destape Web chuan 7/10 pein, tlar hnung lamah hnathawh tur a ngah loh rualin ball a khawih apiangin a che fuh thei hle tih an tarlang a. La Voz thung chuan Martinez-a tan hahchawp miah lova match awlsam tak a khelh liam leh mai thu an sawi ve bawk.

Argentina hian international break tawp nan Benin an la hmachhawn leh dawn a. Head coach Michael Carrick chuan an club dinhmun siamṭha tura a beih mek lai hian, a defender rintlak Martinez hi Old Trafford-ah hliam nei miah lova a dam khawchhuah theih ngei a beisei tlat a ni.