England striker hlui Jermain Defoe chuan Sir Alex Ferguson-a'n Old Trafford-a lakluh a duh em em lai pawha Manchester United a zawm ta lo chu a career-a a thil inchhir berte zinga mi a nih thu a sawichhuak.
Premier League chanchina tlarhma mi goal khung hlauhawm berte zinga mi Defoe hi a vanglai khan West Ham United leh Tottenham Hotspur-ah te a che ṭha thei hle a, England club lian tam tak mit a la ṭhin a ni. Ferguson-a enkawlna hnuaia United an chungnun zual lai khan, kum 2004-a Spurs a zawm hma West Ham-a a awm lai leh Tottenham-a a khelh hnuah pawh United hian he forward hi lakluh an lo tum tawh ṭhin a. Defoe-a tarlan danin khatih hun lai khan United player-te ngei pawhin Ferguson-a hnenah an club-a la lut turin an lo sawipui hial ṭhin a ni.
Kum 43 mi Defoe chuan William Hill podcast, The Warm-Up-a a inlan tumin heti hian a sawi: "Arsenal, Liverpool, Chelsea emaw Man United emaw ka zawm loh chhan hi miin min zawt zing hle mai. Ni khat chu Liverpool fan pakhat nen kan intawk a, 'Khami kuma kan club i rawn zawm theih tak loh chhan kha enge ni?' tiin min zawt a. West Ham-a ka awm lai aṭang tawh khan Man United zawm tur angin sawi ka ni fo ṭhin. Tun hnai lawk khan Patrice Evra nen kan inbia a, ani pawhin, 'Kha mi ṭum khan eng thil nge thleng a, kan club i rawn zawm theih tak loh? Sir Alex Ferguson-a'n i chanchin a sawi reng ṭhin asin!' tiin min zawt a. A tawpa thil thleng kha ka hre bik lo a ni," tiin a sawi.
Defoe chuan sawi chhunzawmin, "He thil hi ka ngaihtuah let fo ṭhin. Chance siam hnem thei Man United ang club lianah khan kal ta ila chuan goal ka khung hnem lehzual ngei ang. Mahse, eng emaw chhan vangin a puitling ta lo a ni. Club liana khel ka ṭhian ṭhenkhat ka biak chang hian, an club-a kal tur khan min duh vek thu an sawi ṭhin a, chu chuan rilru a ti na ve ṭhin. Kenny Dalglish-a manager nih lai khan Steven Gerrard leh Jamie Carragher te inrawlhin Liverpool aṭang pawhin vawi hnih ngawt dawrna ka dawng tawh a. Kum 2009-a Harry Redknapp-a hnuaia Tottenham zawm leh tura inremna ka neih tawh hnu khan agent pakhatin Juventus lama min hruai an tum thu min rawn hrilh bawk," a ti.
Kum 2022-a Sunderland aṭanga inkhelh a chawlhsan hnuah Defoe hian United leh Sir Alex a ngaihsan zia hi vawi eng emaw zat a lo sawi tawh ṭhin a. A vanglai khan Old Trafford khelmuala khelh dan phung (system) nen khan an inmil hle turah a la ngai reng a, engtik niah emaw chuan an tana khelh ngei a inbeisei ṭhin thu a sawi bawk.
Defoe chuan, "Man United nena kan hming an sawi zawm lai kha ka la hria. Mahse manager room kawngkhar kik a, 'Chhuah ka duh' ti chi ka ni lo. Kum 17 mi chauh ka nihin West Ham-ah first team-ah ka lut a, naupang te ni chunga i mumang anga i nun theih chuan i lawm em em mai a ni. Mahse hun liam hnu thlir let hian, United-ah hian ka tawp ngei ka lo inring ṭhin a. Harry Redknapp-a ka ngainat tluk zetin Sir Alex kha ka ngaina a ni," a ti bawk.
A sawi zawmnaah, "United leh an player-te kha ka en reng ṭhin a, an tan chuan chak kha thil awmchhun a ni mai. Ka mizia leh player ka nihna angin Ferguson-a hnuaiah khan khelh ka chak em em ṭhin. Chak reng ka duh a, thawkrim theihtawp ka chhuah bawk ṭhin. Chu boruak chu ka tana inhmeh tak tur a nih ka ring tlat a ni," a ti.
Defoe hian West Ham, Tottenham, Portsmouth, Sunderland leh Bournemouth tan te khelin Premier League-ah goal 162 ngawt a khung a, league chanchina goal khung hnem ber 10-na a ni pha hial a ni. Mahse United-a a luh theih tak loh avangin nomawi lian tham chawi kawngah erawh a beisei a phak ta lo a, kum 2008-a Tottenham nena League Cup an lak bak kha chu England huang chhungah nomawi lian dang a chawi ta lo a ni.
