Bayern Munich superstar Harry Kane lakluh tuma Manchester United beihna chu a beidawnthlak chho mek niin chanchinbu hrang hrang chuan an tarlang. Kum 33 mi England captain hian Allianz Arena-ah hian a contract kum hnuhnung ber a hmang mek a, kum 2027-a Premier League-a a kir leh mai theihna tur chungchang sawi a tam hle a nih kha.
United hian Premier League chanchina goal khung hnem ber dawtu (Alan Shearer dawt) ni mek Kane hi hun rei tak chhung an lo ngaihven tawh a. Tottenham Hotspur-a a awm lai aṭangin khawvela striker ṭha berte zinga mi a ni tih a lo pholang tawh a ni. Kum 2023 nipui laia Bayern a zawm hnuah phei chuan a theihna a sang lehzual a, German champions tan hian match 154 a khelhah goal 152 zet khung tawhin, Bundesliga chanchina goal 100 khung tling hma ber record a siam hial a ni.
Bayern-a Kane-a chet ṭhat em em lai hian, United tlarhma lamin goal khung kawngah harsatna an tawk nasa hle thung. Tun season inelna hrang hrang match sarih an khelhah goal 14 khung tawh mah se, striker pual Benjamin Sesko-a hnen aṭangin goal hnih chiah an la hmu a ni. Slovenian striker Sesko hi RB Leipzig aṭanga lakluh a ni a, season liam ta khan goal 12 khungin bul ṭan ṭha viau mah se, May thlaa a inhliam hnuah pre-season pumhlum a hmaih a, a dinhmun ngaiah a la kir leh hleithei meuh lo. Tun dinhmunah hian hliam tenau avangin chawl lehin, head coach Michael Carrick chuan substitute atan chauh a hmang tlangpui a ni. Joshua Zirkzee pawhin beisei a phak meuh loh bakah chhuak tura sawi a nih bawk avangin, Kane-a lamah United mit a fu nawn leh a ni.
Kum 2023 khan United hian Kane hi lakluh an lo tum tawh a, mahse Rasmus Hojlund an lak tak zawk avangin Hojlund hi Old Trafford-ah a hlawhtling zo lo a, 2025 khan Napoli lam a pan ta a nih kha.
Transfer chanchin hrechiangtu lar Fabrizio Romano chuan a YouTube channel-ah United fan-te tihlim lo tur thuthar puangin, Bayern leh Kane te inkarah contract thar ziahna tur inremna a hnaih tawh hle thu a sawi chhuak a ni.
Romero chuan, "Bayern tan chanchin lawmawm a awm a, Bayern leh Harry Kane, a pa, leh a hmabak enkawlsaktu a unaupa Charlie te inbiakna chu a kal tluang em em a ni. Inremna kimchang tak neih nan hma an sawn chak hle a. Kane-a hlawh tur chungchangah sum lam inremna an nei thawkhat tawh a ni. Tunah chuan contract rei zawng tur te, chhuah theihna clause awm tur leh tur loh te, matching rights chungchang te chinfel a ngai tawh a ni," tiin a sawi.
Romano chuan sawi chhunzawmin, "Bayern leh Kane-a inkarah hian thil tlem fel lo a la awm a, mahse chung thilte chu ni tin leh kar tin mai hian chinfel chhoh zel a ni. Bayern an inhnaih tial tial a, Harry Kane pawh a phur em em tawh avangin, Bayern-a a contract thar tur hi rei lote hnuah tihfel a nih ngei ka ring. Kar tlemte lo la awm turte hi a phurawm dawn hle a, tun kar leh thla thar lamah hian Kane hian Bayern hotute hmuin contract thar a ziah fel ka beisei a ni," a ti bawk.
Kane hian Bayern-ah nuam a tih em avang leh contract thar ziah a hnaih tak avangin, United tan chuan beiseina a chau ta hle a, tlarhma thuam nan Crystal Palace forward Jean-Philippe Mateta ang chi player dang melh a hun tawh zawk maithei a ni.
