April thlaa Selhurst Park-a Premier League Cup final-ah khan Noah Ajayi chuan mawi takin hma hruaina goal a khung a, khup tawlhin hlim takin a lawm a nih kha. Hemi ṭum hian JJ Gabriel pawhin rawn zawmin khelmual kil sirah khup tawlh ve bawkin an lawm dun a ni. He goal hi Gabriel-a'n mahni penalty box bula ball a chhuhsak aṭanga rawn inṭan niin, Ajayi chuan Crystal Palace box chhungah tlan lutin goal-ah a chantir ta a ni.

Ajayi hian ball a khawih hmasak berin amah vengtu player pali te inkarah hmun awl a insiam a, goal thun thei striker zia dik tak pholangin goal-ah a pet lut a ni. Second half-ah Ajayi hi hliam vangin lakchhuah a ngai a, hun pek belh (added time)-ah Palace-in an siphurh an rawn sut tak avangin match hi extra time leh penalty shoot-out thleng a kal a, Palace an chak ta zawk a nih kha.

Selhurst Park-a United Under-18 te inkhel entu Manchester Evening News chuan, "United academy tana a khelh hian Marcus Rashford-a nihna hmuh tur a awm nual a ni. Mual veilam aṭanga ball nena a luh zuih zuih dan leh lei hrula goal a khung dan te hi Rashford-a khelh dan nen a inang hle a, fakna ropui tak a tling a ni. Ajayi hi tun season academy-ah khan ngaihven hlawh lutuk lo mah se, chu chu a inthlak danglam ṭan dawn e. Selhurst Park-ah hliam vanga lakchhuah ni mah se, inkhelh chhunzawm a la duh zia khan a rilru puitlin zia a pholang hle a ni," tiin an lo ziak tawh a ni.

FA Youth Cup final-ah pawh U-18 team hi an tlawm leh a, mahse chu campaign chu he age group-a Player of the Season nihna latu Gabriel-a tan chuan hriatreng tlak a ni thung. Ajayi hian mimal chawimawina dawng ve lo mah se, season chhunga thawhhlawk tak a ni a. Selhurst-a Premier League Cup final-ah goal a khung bakah, Youth Cup quarter-final-ah Old Trafford-ah Sunderland lakah goal pawimawh tak a khung bawk.

Season liam ta U18 match-ah te khan sawi hlawh ber chu Gabriel a ni a. Goal a khung theih em avangin chanchinbu hmai a luah ber a, mahse Ajayi pawh a duai lo hle. Academy match 25 a khelhah goal 9 khungin assist vawi khat a nei a. Sunderland laka halfway line bula ball la a, tlan tlang paha hla deuh aṭanga a pet luh khan theihna ngah tak a ni tih a chiang hle a ni.

United chuan kar kalta khan Ajayi hi professional contract an ziahpui ta a, academy thudawnna chuan an player naupang zinga mi an chelh nghet thei chu an "lawm takzet" tih an sawi bawk. Coach-te chuan Ajayi hi luikawng hlu tak angin an ngai a, nakin zela first-team tana chhawr theih tur zinga mi niin an ngai a ni.

Feet 6 leh inches 2-a sang he forward hian Premier League khel turin taksa lenzawng ṭha tawk a nei a. England-ah chuan taksa len tawk loh avanga hmalam pan thei lo an awm ṭhin laiin, Ajayi erawh chuan puitling zinga inel theihna tur pian a nei ṭha hle. A tlan thut theihna leh chakna chu a hmanraw lian tak a ni a, ball a thunun theih bakah goal khung thiam mi a ni bawk.

Kum 17 mi hian contract a ziah ni khan club media lamin an ngaihven hle a. Tun season hian Under-21 squad-a mi tura ngaih a ni a, mahse a ṭul dan azirin U18 lamah emaw, first team training-ah emaw coach-ten an chhawr ṭhin dawn a ni.

Hliam tenau avangin tun season bul ṭan laia match tlemte a hmaih hnuah, September thla laihawlah Sabah lakah UEFA Youth League-ah bench aṭangin a rawn inlan leh a. He match-ah hian Gabriel chuan hat-trick a siam hnuah social media a delete a, club chhuahsan a dil zui a nih kha. Ni hnih hnuah league hmahruaitu Newcastle U18 lakah Ajayi hi rawn inlan lehin mawi takin goal a khung a; defender-te karah inrawlh tlangin keeper chung zawnah mawi takin ball a chip lut a ni. Gabriel-a'n club a chhuahsan ta a nih pawhin, Ajayi hi a aiawh turin a inpeih sa at tawh a ni.

German thlah Ajayi hi kum 10 a nih aṭanga United academy zawm tawh a ni a, German leh English ṭawng a thiam ve ve bawk. Carrington hnaih maia awm Manchester Grammar School-ah a kal ṭhin a ni.