Footballer zingah Manchester United player ropui leh hmingthangte hming chawia hming phuah an awm fo ṭhin a, Chelsea star Cole Palmer pawh a pa chu United tantu ruhkawng a nih avangin Andy Cole-a hming chawi a ni. Tunah hian England women's team (Lionesses) squad-a koh thar Erica Meg Parkinson pawhin United legend Eric Cantona hming chawia sak a nih thu a sawichhuak ve leh ta a ni.

England hian Zirtawpni, October 9 hian play-off first leg match chu khualmualah Greece an hmachhawn dawn a, Thawhlehni lehpekah mahni mualah return leg an khel chhunzawm ang. Sarina Wiegman-i naute hian heng inkhel pahnihah hian hnehna an chang a nih chuan, round hnihnaah play-off Path 2-a chak zawk an hmachhawn ang a, he round aṭanga tling ṭha pasarihte hian World Cup khelh theihna hmun an chang dawn a ni.

Wiegman-i squad zingah mit fuk rawn ber zinga mi chu North Carolina Courage midfielder Erica Meg Parkinson hi a ni. England tana youth level hrang hranga lo inlan tawh Parkinson hian season liam ta khan senior call-up hmasa ber a lo dawng tawh a, mahse senior team tan hian debut a la siam lo thung a ni. Singapore-a piang niin, a pa hi English mi leh a nu hi Japan mi an ni a, a unaupa chu FC Porto academy-a khel tura thlan a nih avangin Portugal lamah pawh a lo khel tawh bawk a ni.

Greece nena an inhmachhawn hmaa chanchinbumite a kawmnaah, kum eng emaw zat chhung United khel ṭha berte zinga mi Eric Cantona hming chawia sak a nih dan chu Parkinson-i chuan a sawi chhuak a ni.

Parkinson-i chuan, "Ka pa hi Man United fan ruhkawng tak mai a ni a. Chuvang chuan kan chhungkua pawh United football chhungkua kan ni chho ta ringawt mai a ni. Eric Cantona hming chawia phuah ka ni a, chuvangin a hming chawi chu a thil lawmawm tak a ni; a karate pet (karate kick) tih lohah kha chuan player ṭha ber zinga mi a ni hrim hrim a," tiin a sawi.

Sawi zawmin, "Ka unaupa pawh Denis Law-a hming chawiin an phuah bawk a ni. Kan hming phuahnaah hian ka nu chuan thutlukna siam theihna hmun a chang tehchiam lo va, a pawm ve ta mai a nih hmel. Mahse tunah chuan kan unauvin football kan khel dun ta vek a, a kal fuh ta phian a nih hi," tiin a sawi bawk.

He chanchin hian Parkinson-i football zinkawngah hian hriatreng a hlawh zui ngei a rinawm a, a bikin hlawhtlinna lian zawk a chan chhoh zel phei chuan a larpui zual ang. La sawi dawt lo mah se, a hringnun thawnthu en hian a tawpah chuan Manchester United tana khelh chu a suangtuahna zinga mi a nih ngei pawh a rinawm a ni.