Zirtawpni khan Manchester United chuan mipui luh theih lohva inkhelh (behind closed doors friendly)-ah Swiss club Lausanne an hmachhawn a, he inkhelah hian an midfielder thar Carlos Baleba chu United jersey hain a vawi khat nan khelmualah a rawn inlan ṭan ta a ni.

Kumin nipui bazar lai khan kum 22 mi Baleba hi Brighton aṭangin Old Trafford panin a insawn a, mahse Manchester a pan hmaa a kerek hliam a tawrh avangin Michael Carrick-a hnuaiah competitive match-ah a la inlan thei lo a ni. International break hma lawka Fulham nena 1-1 a an inhnehtawk ṭum khan Craven Cottage-ah United squad-ah telh ni tawhin bench-ah a ṭhu a, mahse khelmual chhungah erawh chhawr a la ni lo thung. Tunah hian a fitness a neih chhoh leh tawh avangin, international break zawha Premier League an khelh leh hunah chuan Tottenham hmachhawn tur squad-ah a inlan theih ngei beisei a ni tawh a ni.

United unau club (sister club) Lausanne nena Carrington-a an inkhelh hi Cameroon international Baleba-a tan chuan a dinhmun ṭha zawk fiahna hun pawimawh tak a tling a, kar kalta chhung zawng khan fitness ṭha a neih let theih nan ruahmanna bik (training programme) uluk tak a lo zawm tawh a ni.

Carrington-a inkhelah hian United chu 2-1 in an chak nia tarlan a ni a, Baleba bakah ram tana fehchhuak lo senior player pawimawh dangte pawh an inlan nual a ni. Heng zingah hian Harry Maguire leh Matheus Cunha te an tel a, chu bakah United academy rawlthar engemaw zatin inkhelh theihna hun remchang an nei bawk. Head coach Michael Carrick-a fapa Jacey Carrick bakah Amir Ibragimov, Yuel Helafu leh Victor Musa te an inlan a, Diego Leon leh Enzo Kana-Biyik te pawh khelmualah minute engemaw zat chhawr an ni bawk.

He friendly match hmang hian United hotute chuan Lausanne lama loan-a an kaltir rawlthar theihna nei ṭha Sekou Kone-a khelh dan chu an mit ngeiin an thlithlai thei bawk a, Swiss club Lausanne lamah hian United academy chhuak defender hlui Tyler Fredricson pawh a inlan ve bawk a ni.