Bournemouth laka mualpho taka an tlawm hnu khan, Manchester United manager Michael Carrick chu a hna humhim nan match thum chhung hun pek a ni a. Hemi hnu hian international break a lo thleng a, INEOS chuan he manager hi ban nghal mai an tum rih lo nia tarlan a ni.

United hian heng hun tiam pek a nih hnua an match hmasaberah Chelsea an hmachhawn a, first-half chhungin khel ṭha viau mah se an hneh lo a nih kha. Mahse hemi hnu hian Champions League inelna lamah an rilru fuktirin, AS Roma chu an hnufual tawh hnu aṭangin mawi takin an rawn lehthal a, hnehna pawimawh tak an hlawhchhuak ta a ni.

Tichuan Pathianni khan inelna pui dang hmachhawn lehin, Red Devils te hian Aston Villa chu goal riat ngawt luhna inkhel hmuhnawm takah an hmachhawn leh a. He inkhelah hian half tinah goal hnih ngawta an hnufual zawn hnuah, thapui thawhin an rawn inlehlut a, point khat hlu tak an hlawhchhuak hram a ni.

The Athletic-in a tarlan danin, INEOS chuan club-in dinhmun harsa tak a hmachhawn mek avangin manager thlaktu tur options dangte chu uluk takin an la chhui zui reng a ni. Mahse tun dinhmunah chuan international break chhung hian Carrick hi ban nghal rum rum an tum lem lo tih a lang. Carrick-a hnuaia team-te inpekna leh beih fat fatna aṭang hian management team lamin a laka beiseina tlem an la neih avangin, international break zawhah pawh a dinhmun thlithlai chhunzawm rih turin ruahmanna an siam a ni.