Manchester United captain hlui Gary Neville chuan Aston Villa nena 4-4 a an inhnehtawk hnuah a club hlui hruaitute (leadership) chet dan leh thutlukna siam ṭhin dan chu a sawisel nasa hle a, board lamin thil tih dan tur an hre lo hrim hrim nia a hriat thu a sawi.

Old Trafford-a inkhelah Man Utd hi a tir lam aṭangin goal chhuah awlsam tak leh defense venhim dan mumal lo tak phochhuakin an awm leh hle a. Mahse, siphurh hnih aṭanga vawihnih ngawt rawn kir lehin point khat an hlawhchhuah hram a ni. Thawhlehni liam taa Champions League-a AS Roma 3-2 a an hneh ṭum pawh khan 0-2 a hnufual aṭangin an rawn kir leh tawh bawk a ni.

He match-ah hian tlawm zawk ta se manager Michael Carrick-a hmakhua a tawp nghal vek tura ngaih a nih laiin, hun tawp dawn minute-ah an rawn nihrual tak avangin international break chhung hian United board lamin Carrick-a hmakhua atan thutlukna eng nge an siam dawn tih chu ngaihdan siam thiam rual a ni ta lo.

Match zawha NBC nen an inbiaknaah Neville chuan, "Michael Carrick-a'n season liam ta khan manager thar nih phurna (bounce) a rawn thlen tawh a. Manager thar an luh tirhin thla engemaw ti chhung chu mi tin an hlim a, mahse thla ruk a liam meuh chuan harsatna ngai bawk kha a rawn thleng leh ṭhin a ni," tiin a sawi.

Neville chuan sawi chhunzawmin, "Manager thlak reng hi chhanna tur nia ngaiin i thlak chhen thei a. Mahse kum 12 chhungin manager pariat ngawt thlak a ni tawh a, hei hi chhanna a ni lo tih a chiang tawh a ni. Michael-a hi a chhuak thei a, a awm chhunzawm thei bawk, chutiang chu kan hre lo a, neitute (ownership) lamin tih tur an hre bawk hek lo," tiin a sawi.

Pundit hian United board-in kum tam tak chhung thutlukna ṭha lo an lo siam tawh hrang hrangte chu sawisel zuiin, manager lo chelh hman tawh Amorim, Ten Hag, Ole Gunnar Solskjaer, Carrick, Jose Mourinho, Louis van Gaal, David Moyes leh Ralf Rangnick te hming a lam a. Heng manager-te zingah hian hlawhtlinna ropui tak lo chhawm tawh world class manager te leh manager rawlthar beiseina ngah tak tak te, club chhungril hrechiang tu player hlui te an tel vek tih a sawi.

Neville chuan hruaitu chungnung aṭanga a hnuai ber thlenga ruahmanna dik leh inthlunzawmna a awm loh chuan manager ṭha tak tak te pawh an ruitlang vek dawn tih sawiin, "Khawvela inawpna (organisation) tawh phawt hi a chhip aṭanga a hnuai thlengin hruaitu inkawp tlat a awm loh chuan an tlu chhia ang," a ti bawk.

A tawp berah Neville chuan, "Football club chhungah hian buaina tak tak a awm a ni, heng senior position-a mawhphurhna chelhtute hi hmana hetiang hna la thawk ngai miah lo leh tawn hriat nei lo te an ni," tiin a ziak a ni.

Manchester United hian November 22, Pathianni hian khualmualah Liverpool an hmachhawn ang a, he match-ah hian Michael Carrick-a hi dugout-ah a la ṭhu reng angem tih chu hmuh a chakawm hle dawn a ni.