Manchester United rawlthar theihna ngah JJ Gabriel-a hmalam hun tur chu a la hriat chian theih lawk loh va. United aṭanga chhuah phalna tura deregister a dil aṭanga thla khat dawn a liam hnuah pawh a pan tur club tak chu a la hriat theih loh a ni.

Club neitu Ineos lamin a rilru thlak tura theih tawp chhuah mah se, tun thlengin hlawhtlinna an la chang rih lo. Gabriel hian Old Trafford chhuahsan ngei a tum ruh hle a, tun kar chhung khan engtin nge a chhuah theih dawn tih chu a rawn lang chiang ṭan a ni.

Thawhlehni khan he rawlthar hian kum 16 a tling ve chiah a, Cyprus passport (Cypriot passport) a neih theih beisei a nih tak avangin European Union citizenship a nei thei dawn ta a ni. Hei hian ram danga kalsawn theihna kawng a hawnsak dawn a, FIFA dan ang thlapin United hian zangnadawmna (compensation) sum an dawn a ngai bawk ang.

Mahse Gabriel lak tumtu club apiang chuan United hnena zangnadawmna pek chauh duhtawk lovin, he rawlthar hlawh phut zat hi an pek ngam a ngai dawn a ni. Report tarlan danin kum khatah a tlem berah hlawh €1 million vel (kar khatah £16,000 aṭanga £20,000 bawr vel) a phut a. Bayern Munich chuan hetiang zat hlawh pek chu an harsat deuh nia tarlan a ni.

Chutih laiin, Real Madrid erawh chuan Gabriel-a'n Bernabéu a pan theih nan hetiang zat sum thehchhuah hi an inpeih niin a lang thung. Bernabéu Digital chuan heti hian an tarlang: "Real Madrid chuan player leh Manchester United-in an phut zat thehchhuah an inpeih niin a lang a, nakin hun atana player pawimawh tak tur a nih bakah hun reilote hnuah first team pawh a zawm nghal mai theih beisei a ni," tiin an ziak.

Real Madrid-in hetianga hma an lak duh hmelna hian he tlangval inchuhna boruak hi a tithar hle a ni. Attacking player naupang tak duhtu club zingah hian Barcelona chu an talbuai ber tur an ni hial awm e. Gabriel hian Barcelona pan a duh ber nia sawi ṭhin ni mah se, an hmelma lian Real Madrid hian an rawn khalh mai ang tih a hlauhawm hle a, Catalan club hian rang taka hma an lak vat loh chuan an thil tum an hlawhtling lo palh thei a ni.

Gabriel-a mimal inremna phut zat hi he rawlthar lak tumna kawnga thil pawimawh ber pakhat a ni chho mek a. Mahse Real Madrid-in chet an la tih hi thudawnna lian dangte'n an la nemnghet ve rih lo va, Gabriel-a hmalam hun sawi laih laih laia Real Madrid tana boruak siam tumna mai a nih theih thu pawh tarlan a ni bawk.