Manchester City chu Premier League-in sum lama dan an bawhchhiat avanga thiam loh a chantir hnuah buaina lian tak chhungah an lut mek a, an khawpui elpui lian Manchester United huang chhungah pawh sawi zui a hlawh hle.
Premier League independent commission chuan thutlukna an siam hnuah City chu an chungchanga dan bawhchhiatna puhna (charges) 115 awm zawng zawngah thiam loh an nei vek tih an nemnghet a. September thlaa commission thutlukna puan chhuah a nih hnu khan City chuan engmah tihsual an neih loh thu sawiin an zualko (appeal) zui nghal bawk a ni.
Premier League thutlukna kalh zawnga City hian hma an lak mek avang hian, club chungah engtiang chiahin nge hremna an lek dawn tih chu football khawvel chuan thlir reng chungin an la ngaichang mek a ni. Man City hian point paihsak aṭanga Premier League aṭanga hnawhchhuah hial te pawh an tawk thei dawn nia sawi a awm bawk a, speculation hrang hrang a lian hle.
City-in sum lama dan a bawhchhiat nia an sawi chungchangah hian, an lo lak tawh title lian thamte hlihsak an ni dawn em tih chu inhnialna lian tak a tling chho bawk a ni. City hian kum 2011-12 season-a an Premier League title lak chu an chan a, chu nomawi chu retroactively-a United hnenah hlan a nih chuan, Rio Ferdinand hian Premier League winners' medal dang a awrh belh leh theihna kawng a inhawng dawn a ni.
A podcast kaltlangin, kum 47 mi defender hlui Ferdinand chuan City hian an fihlim zia an lantir zo lo a nih chuan, a biak hmasak ber turte zinga mi chu Red Devils chief executive hlui David Gill a nih tur thu a puang chhuak a. United legend Ferdinand hian kum 2012-a an Premier League win bonus tur chu Gill-a hnenah a zawt ngei dawn tih fiamthu titak deuhin a sawi lang bawk a ni.
Rio Ferdinand Presents-ah Ferdinand chuan, "Court-a thiam loh an chantirna avanga keini hnenah Premier League title hi min hlan a nih chuan, ka win bonus chungchangah Mr David Gill ka biak ngei a ngai ang. Chu chu inbiakna phurawm leh bengvarthlak tak a tling ngei ang. Ka win bonus chu ka duh dawn hrim hrim a ni, min ring rawh u," tiin a sawi chhuak a ni.
Ferdinand hi kum 2011-12 Premier League title inchuhna rapthlak takah khan Sir Alex Ferguson-a hote zinga mi a ni a, opening day aṭanga final day thlenga an beih hnuah City lakah beidawng takin an tlawm a nih kha. David Gill hi former United manager Sir Alex Ferguson-a hun laia mi pawimawh tak a ni a, kum 2013 khan he Scottish manager ropui tak nen hian Premier League club hi an lo chhuahsan rual nghe nghe a ni.
