Manchester United hotute chuan team head coach Michael Carrick-a dinhmun chu ngunthluk takin an zirchiang mek a, kum 45 mi hi ban a ni dawn leh dawn loh chungchangah tun kar chhung hian thutlukna siam an tum nia hriat a ni.

International break kan chhoh ṭan meklai hian United hi relegation zone-ah an awm mek a, Pathiannia Aston Villa nen 4-4 a an inhnehtawk takah khan tun season Premier League match 10 an khelh tawh zingah vawikhat chiah hnehna an la chan pui a ni.

Kar hnih liam ta khan Como leh Bournemouth te laka goal 3 faia an tlawm zawn hnu khan Carrick hi ban mai tawh tura ngaih a ni a, mahse mawhphurhna chelhtute chuan insiamremna hun an pe ta hram a nih kha.

Hemi hnu hian United khelh danah hmasawnna tlem awm bawk mah se, Chelsea, Roma leh Villa te an hmachhawnna match-ah vawikhat chiah hnehna an chang thei a, team harsatna leh tlarhnung thawk chak lo lutuk erawh a la lang chiang hle a ni.

Stamford Bridge-ah Chelsea laka Lisandro Martinez-a hnawhchhuah a nih hmain United an che ṭha zawk hle a. Champions League-ah Roma laka 2-0 a an hnufual hnuin 3-2 in an rawn inthlahnawh leh a ni. Aston Villa lakah pawh 2-0 leh 4-2 a an hnufual hnuah, injury time-ah Joshua Zirkzee leh Patrick Dorgu te goal khung hmangin 4-4 in an rawn inhnehtawk pui leh hram a ni.

Heng match-ah hian match khat chauh tlawm mah se, goal 8 ngawt an chhuah hman a, a zawn zawna goal chhuah thut thut ṭhin mize chhia bawk kha an phohchhuah leh tak avangin Carrick-a tan a ṭha zawnga sawi tur a tlem hle.

International break vangin kar hnih chhung chawlh a awm dawn takah chuan United hotute chu Carrick-a hmabak chungchang sawiho turin an inkhawm leh dawn ta a ni. Chief executive Omar Berrada leh director of football Jason Wilcox te chu he inbiaknaah hian an inrawlh lian hle dawn a, amaherawhchu an pahnih hian mawhphurhna leh thil tih sualah mawhphurh ve tho tura ngaih an ni.

Co-owner Sir Jim Ratcliffe leh Glazer chhungkua pawh Carrick-a hmabak chungchanga thutlukna hnuhnung ber siamnaah hian an inrawlh dawn bawk. Carrick hian match 32 a enkawlnaah United hi tun season-a inelna hrang hrang match 15 an khelh tawh zingah vawithum chiah hnehna an la chan a ni.

Manager thar thlakna tur langsar tak an la hmuh loh avangin Carrick hian hun tlem a la nei rih a, tun dinhmunah club nei lo Eddie Howe leh Julian Nagelsmann te chu United manager thar ni thei bera chhal an ni a, USA boss Mauricio Pochettino pawh an thlankawm zingah a tel nia hriat a ni.