Manchester United Women star Ella Toone chu football tualzawla a thawhhlawk em avangin chawimawina hlu tak hlan a ni a, he award a dawn hnu hian a phurin a lawm hle tih a sawichhuak.

Kum 2018-a Manchester United Women team din thar leh a nih a, division hnihna aṭanga bul an ṭan lai khan Toone hian United hi a zawm a. Hemi hnu hian hmasawn chho zelin club tan hian Championship title leh FA Cup nomawite a chawipui tawh a ni. He attacker hi United tana match khel hnem ber niin, inelna hrang hrangah match 222 lai a inlan tawh a; chu mai bakah goal 66 khung tawhin club chanchina goal khung hnem ber nihna a hauh mek bawk a ni.

Club tana a chet ṭhat bakah hian England national team tan pawh hlawhtlinna lian tak tak a chang tawh a. Lionesses chu Euro 2022 leh Euro 2025-ah te champion pui tawhin, kum 2022-a Wembley Stadium-a final an khelh ṭum phei kha chuan hnehna an channa goal pawimawh a khung hial a nih kha.

United official website-in a tarlan danin, Manchester khawpui leh a ziarang chawimawina puala neih, tun kar 'This Is Manchester Awards' semna inkhawmah chuan football khawvela Toone-i thawhhlawkna ropui tak chu hriatpuiin he chawimawina hi an hlan ta a ni.

Toone-i thawhhlawkna hi khelmual chhung chauhvah a tawp lo va. Nikum khan ani hian 'ET7 Academy' a din a; he ruahmanna hi kum 8 leh 19 inkar hmeichhe naupangte'n football an zir theih nan te, an theihna an tihhmasawn a, an suangtuahna an tihpuitlin theih nana kawng hawnsak tumna a ni. Chu mai bakah, kumin nipui chhung khan Chorley Women Football Club-ah creative leh strategic advisor hna a lo chelh tawh bawk a ni.

He chawimawina a dawn hnu hian MUTV hnenah Toone chuan a ngaihdan sawiin, "Ka tan chuan chawimawina ropui tak a ni a, hetiang award dawn hi a nuam takzet a ni. Khelmual chhungah theih tawp chhuah a, midangte tana entawntlak nih hi ka thil duh ber a ni a; ka thlen chin leh ka theihna hi hmeichhe naupang leh mipa naupangte fuih phur nan a tam thei ang ber hman ka duh a ni," tiin a sawi.

Sawi chhunzawmin Toone chuan, "Hetiang dinhmun ka thleng thei hi a lawmawm em em a; ka theihna hi kawng ṭha zawnga hmangin, naupangte'n an zinkawng an ṭan theih nan leh mi zawng zawng tan hun remchang inang tlang pek a nih theih nan ṭanpui ka duh a ni. Hei hi ka chhuanna leh tih nuam ka tih em em thil a ni reng bawk," a ti.

Ella Toone leh United Women te hian vawiin tlai lam hian Women's Super League (WSL) inkhelah khualmualah Aston Villa an hmachhawn zui leh nghal dawn a ni.