Pathiannia Old Trafford-a Bournemouth nena Premier League inkhel pawimawh tak an hmachhawn hmain, Manchester United head coach Michael Carrick chuan chanchinbumite hmaah an team dinhmun chungchang a sawifiah a. Tun hnaia match an khelha an chetsual ṭhin chhan sawiin, khelmuala thil hrang hrang avanga chak zo lo an nih thu leh a chhan chu a hriatchian em em thu a tarlang a ni.

Nipui transfer bazar laia club thuneitute lam aṭanga ṭanpuina leh thlawpna a dawn tawk loh vanga hetiang dinhmuna ding hi an nih leh nih loh an zawhna chu chhangin, "Thlawpna dawn tam leh tlem lam a ni lo. Khelmuala thil dik tiha result ṭha neih hi a pawimawh ber zawk a ni a, tun hnai hian khelmualah kan ti ṭha tawk lo a ni ber e," tiin club hotute lam kawk kual lovin khelmual chhung mawhphurhna a dah pawimawh zawk thu a sawi.

Leeds United laka an chet ṭhat hnuah Como laka beisei loh taka an chet chhiat leh tak thut avanga Pathiannia inkhelah a player-te a la ring ngam em tih an zawh nawnna chu Carrick chuan chhang letin, "Ka ring tawk takzet, zaa za (100%) in ka ring tawk a ni. Kha zan kha chhan hrang hrang vangin zan ṭha a ni lo tih chu kan hre chiang tlang vek a. Pathianniah chuan team danglam hlak kan ni tawh dawn a, kan nih ngei pawh a ngai a ni," tiin a player-te lakah rinna a la nghah pumhlum tlat thu a sawi.

Ruben Amorim leh Ralf Rangnick-a te hun lai aṭanga tlan tam tawk lo leh pressing ṭha tawk lo anga an lo sawisel ṭhin chungchangah pawh Carrick chuan thu tlang takin a sawi a, "Tlan lo anga in sawi ṭhin hi chu fimkhur deuh a ngai a ni. Pressing tih hi football huang chhunga thil te takte pakhat chauh a ni a. Pressing tih hian awmzia hrang hrang a nei a, eng vanga ti nge kan nih tih te, kan chakna lai a ni em tih leh hmun awl hnawhkhat tura tih a ni em tih thlengin thil tam tak a awm. Football-ah chak tur hian pressing neih kher hi a ngai reng lo a, ṭul chang a awm a, ṭul loh chang pawh a awm bawk. Chuvangin tlan tam lam statistics hian inkhel awmzia a hril vek kher lo a ni," tiin a sawifiah a ni.

Team enkawl harsa khawpa dinhmun hniamah an ding em tih leh tactics chungchangah sawi zelin, Carrick chuan khelh dan kawng hrang hrang an neih theih thu a sawi a. "Khelh dan phung hrang hrang, tactics leh system engpawh hmang ila, tuna kan khelh aia ṭha hian kan khel thei a ni," tiin an theihna phochhuah tawk loh vang zawk a nih thu a tarlang bawk.

Manchester United nihna leh a chanchin ropui takte chuan an tan phurna a thlen reng thu sawiin, "He football club hian mipui tam tak tan awmzia a nei thuk hle tih ka hria a. Hnehna chang ṭhin team chuan chak nih an phu ngei tur a ni a, club chanchin ropui aṭangin fuihna kan la tur a ni. Chu chu hma lamah chhawm nung zel tura mawhphurhna kan neih hi a pawimawh em em bawk," a ti. Chutih rualin, hun khirh an hmachhawn laia manager hlui Sir Alex Ferguson leh Ole Gunnar Solskjaer te a be ṭhin em tih zawhna chu chhangin, anni pahnih hi chu a titi pui fo ṭhin thu leh tun kar bikah pawh thil thar a awm lem loh thu a sawi bawk a ni.