Manchester United manager kum 45 mi Michael Carrick chuan pressure a hmachhawn ṭan mek a, Red Devils hian inelna hrang hrang match paruk an khelh tawhah beisei an phak tawk lo hle.
Tun 2026-27 season Premier League-ah United hian vawi khat chiah hnehna an la chang a, Michael Carrick-a hnuaiah hian vawi hnih tlawmin vawi khat an draw tawh bawk a ni.
Kar liam ta khan Champions League opener-ah Old Trafford-ah Sabah chu 4-0 ngawtin an sawp a, clean sheet pawh an nei ngei mai; mahse, Carabao Cup aṭanga an tlak hnuah tun karah Brighton lakah an tlawm zui leh a, Carrick-a naute dinhmun a tiṭha lo lehzual hle a ni.
Season liam ta 2025-26 campaign-a Ruben Amorim-a enkawlna hnuaia Premier League match li an khelh hnu kha thlirin, tun season-a Michael Carrick-a hnuaia United chet dan nen hian thil tam takah a inang chiah chiah a ni. Season liam ta khan Amorim-a naute chuan Premier League match li hmasa berah vawi khat chak, vawi khat draw leh vawi hnih tlawm neiin point 4 chiah an lo hlawhchhuak bawk a nih kha.
Chu mai bakah, Amorim-a naute'n match li-ah goal sarih an chhuah ang chiah khan Carrick-a enkawl mek Red Devils squad pawhin goal sarih an chhuah ve bawk a ni. Amaherawhchu Carrick-a hnuaiah hian United hian goal erawh an khung hnem zawk thung a, Carrick-a hnuaiah match li-ah goal sarih an khung tawh laiin, Amorim-a hnuaiah kha chuan goal li chauh an khung a ni.
Amorim leh Carrick-a te hian match li hmasa berah tlarhnung venhim lamah harsatna lian tak an tawk ve ve a, a bik takin Premier League-ah clean sheet an nei thei lo ve ve a ni. Carrick-a naute hian mahni mualah leh khualmualah Premier League match li an khelh tawhah clean sheet vawi khat mah an la nei lo a. Season liam ta khan manager hlui Amorim-a hnuaiah pawh hian Premier League match pasarihna an khelh thleng khan clean sheet an nei thei bik lo a nih kha.
Nikum October thla khan Old Trafford-a Sunderland 2-0 a an hneh ṭum khan Amorim-a naute chuan league-ah clean sheet an nei ve thei ta chauh a ni. Tun season-a an match result neih mekah sawiselna a nasat tawh em avangin, Carrick pawh hian 2025-26 campaign-a thil thleng ang kha thlen nawn a hlau hle ang.
October thlaa international break thlen hmain Premier League-a clean sheet neih theih loh zawnna chu chhuahsan theihna hunṭha Carrick hian a la nei reng a. Amaherawhchu, kar tawpah hian Craven Cottage-ah Fulham chu fiahna khirh tak hmachhawnin an lenchilh dawn a, hetah hian tun season chhunga an league clean sheet hmasaber nei turin theih tawp an chhuah a ngai dawn a ni.
