Manchester United chuan an academy rawlthar theihna ngah tak, kum 15 mi JJ Gabriel-a'n club a chhuahsan a nih chuan dan anga hmalak (legal action lak) an rilruk mek niin Inrinni chanchinbute chuan an tarlang.
He winger tleirawl hian thla hmasa khan Manchester United hotute hnenah a inziahluhna (registration) chu ṭhiahsak a, in-deregister a duh thu a lo thlen tawh a ni. Mahse, United lam hian a ngenna hi lo hnawlsakin, Old Trafford-a cham zui tura thlem thlu thei turin an la inbeisei fan a ni. Chutiang chu dinhmun ni mah se, club chhungril thudawnte chuan he rawlthar theihna ngah tak hian chhuahsan a tum nghet hle tawh niin an sawi a, khelmual chhuahsan vat a duh tlat niin an tarlang bawk.
Gabriel-a dinhmun a chian loh tak hnu hian Europe club liante chuan an ngaihven nghal em em a. Real Madrid, Barcelona leh Bayern Munich te bakah Europe khawmualpuia club ṭha ber berte chuan he English forward naupang tak hi lakluh tumin an lo bihthla reng tawh a ni. SPORT leh The Sun chanchinbuin an tarlan danin, Spanish club lian pahnih Real Madrid leh Barcelona te hian Gabriel-a dinhmun hi an ngaihven zual hle a ni.
JJ Gabriel hi kumin October ni 6-ah kum 16 a tling dawn chauh a. Khawvel football dan ang chuan kum 16 tling lo tan chuan ram danga club lian zawm zung zung hi thil harsa tak a ni ṭhin. Amaherawhchu, he rawlthar hian Irish emaw Cypriot passport emaw a neih theih hlauh chuan, Britain ram chhuahsana Europe club dang zawm theihna kawng a inhawng thei dawn a ni.
United hian an academy-a theihna nei ṭha berte zinga mi hi hralh emaw a thlawna chhuah tir emaw an tum lo hle a. A hun hma lutuka chhuah a tum tlat a nih chuan dan ang thlapa thubuai siamsak an inhuam hial niin a lang. Club hian an player naupang theihna sang tak chu an first team thleng chho tura an ngaih pawimawh em em laiin, Europe khawmualpui club liante laka chân mai chu thil huphurhawm tak a tling a ni.
Gabriel hi tun season pre-season match-ah te pawh senior team nena khel tura koh tel a lo ni tawh a, Michael Carrick-a naute zingah pawh a chet ṭhat ṭhin em avangin United ṭantute mit a la hle a nih kha. Mahse chuti chung chuan khelmual piah lamah a hmabak tur chungchang hian thawm a nei lian chho ta hle a, a tawpah chuan dan hmanga inchuhna a chhuak zui dawn nge, United hian an chelh thei dawn tih chu tun thla chhung hian a chian theih a rinawm hle a ni.
