Bruno Fernandes-a hmabak Old Trafford-ah a la chian loh avangin, Manchester United chuan an captain thlaktu tur hi rang thei ang bera an lakluh a ngai dawn niin a lang.
Portuguese superstar Fernandes-a contract neih lai hi nakkum nipuiah a tawp dawn a, hlawh chungchanga ngaihdan a inan chiah loh avangin inbiakna pawh a ṭhuanawp rih a ni. Mahse, United hian a contract hi kum khat dang pawhsei theihna (extension option) an kawl thung. Europe club lian hrang hrangin an ngaihven tak em avangin, Red Devils hian an club captain chu a thlawna an chan loh nan he option hi hman an tum hle a ni.
Chutih rualin, Mason Mount-a hliam neih ngun lutuk bakah, head coach Michael Carrick-a'n ani hi tlar laili thuk zawk aṭanga khel (deep-lying playmaker) anga a hman tak zawk avangin, Fernandes-a kianga zirlai ni thei tur leh, a chhuah huna a hmunruak luah chho thei tur rawlthar lakluh United hian an mamawh a ni.
United neitute hian Premier League-a lo inlan tawh leh theihna pholang tawh player lakluh an duh tih hriat sa a ni a, TEAMtalk tarlan danin Premier League title vawi 20 la tawhtu hian player melh lai an nei fel tawh bawk. Chu chu Fulham rawlthar Josh King a ni. Kum 19 mi King hian tun season-ah Craven Cottage club tan hian boruak a siam nghal hle a, season liam taa a goal khung zat chu tun season-a match ruk chauh a khelh chhungin a rawn tlin der tawh a ni.
He rawlthar che ṭha tak hian khawvela club lian hrang hrang - Barcelona, Chelsea leh Liverpool te ngaihven a hlawh chho nghal a. Mahse, he tlangval inchuhna kawngah hian Catalan club lian Barcelona hi United elpui lian ber tur an ni dawn niin a lang.
TEAMtalk chuan tarlangin: "Fulham player Josh King thlithlaitu club pung tual tual zingah Barcelona pawh an tel ve ta a. Catalan club scout-te chuan tun season-a an va ennaah Cottagers midfielder naupang chet dan chu ropui an ti hle a ni. Chelsea, Liverpool leh Manchester United te pawhin kum 19 mi King hi uluk takin an thlithlai reng a, England-a club lian bera chhiarte mit a la chhunzawm zel a ni. Thudawnna chuan Barca hotute chu tun season-a King-a chet danah hian an lungawi hle a, tlarhmaa dinhmun sang bera inhlangkai thei tur khawpa theihna nei player-ah an ngai a ni," tiin an ziak.
England Under-21 international King hian Craven Cottage-ah hian kum 2029 thleng daih contract a la nei a, chuvang chuan manager Alvaro Arbeloa enkawl team aṭanga London tlangval lakchhuah hi thil awlsam a ni dawn lo hle.
La Liga club lian Barcelona hian nakkum nipuia King lakluh tura hma lak nan Fulham tlak hniam hun an thlir mek a ni. Craven Cottage club hi tun dinhmunah league table-ah 19-na dinhmunah an awm mek a, tun season tawpah an tla thla a nih hlauh chuan, a duhtu club-te tan a man tlawm zawk fêa lak theihna kawng a inhawng thei dawn a ni.
